Бақытжан Базарбек жол апатынан зардап шеккен азаматтың туыстарымен бірге видео жариялады

Бұрынғы Мәжіліс депутаты Бақытжан Базарбек Жамбыл облысында өзі қатысқан жол апатынан зардап шеккен 36 жастағы азаматтың туыстарымен бірге видеоүндеу жариялады, деп хабарлайды Orda.kz.        

Ол азаматтың емделуіне көмектесетінін айтып, қоғамды расталмаған ақпарат таратпауға шақырды.

Жол апаты 15 тамызда Тұрар Рысқұлов ауданындағы «Батыс Еуропа – Батыс Қытай» халықаралық автодәлізінде болған. Алдын ала мәлімет бойынша, Toyota автокөлігі жолдың жүріс бөлігінде тұрған ер адамды қағып кеткен. Полиция жол-көлік оқиғасы бойынша қылмыстық іс қозғаған.

Оқиғадан кейін әлеуметтік желілерде көлікті Бақытжан Базарбек басқарғаны туралы ақпарат тарады. Кейін бұрынғы депутат жол апатына қатысқанын өзі растады. Алайда ол тергеу барысына байланысты оқиғаның егжей-тегжейін жариялай алмайтынын мәлімдеді.

Жол апатынан 1989 жылы туған ер адам зардап шеккен. Ол 15 тамыз күні кешке ауруханаға жеткізіліп, жансақтау бөліміне жатқызылған. Бұрынғы депутаттың мәліметінше, зардап шеккен азаматтың жағдайы жақсарған. 

Бұған дейін Жамбыл облысының денсаулық сақтау басқармасы оның жағдайын өте ауыр деп бағалаған. Науқасқа бірнеше жарақат, ауыр бас-ми жарақаты, миының зақымдануы, қабырғаларының бірнеше жерден сынуы, екі жақты гемопневмоторакс, оң жақ сирақ сүйектерінің ашық сынуы және ауыр дәрежедегі жарақаттық шок диагноздары қойылған.

Ал қазір зардап шеккен азаматтың туыстары оның жағдайында оң өзгеріс бар екенін хабарлады.

Жәбірленушінің әпкесінің айтуынша, қазір оның жағдайы қанағаттанарлық, ем қабылдауы жалғасып жатыр. Ол медицина қызметкерлеріне алғысын білдіріп, азаматтың тезірек сауығып кетуін тілейтінін айтты.

Бақытжан Базарбек зардап шеккен азаматтың туыстарымен бірге видео жариялап, қазіргі таңда отбасының жанында екенін айтты.

Бұрынғы депутаттың сөзінше, науқасты емдеу Жамбыл облысының денсаулық сақтау басқармасының көмегімен жүргізіліп жатыр. Оған реаниматологтар, травматологтар және басқа да мамандар тартылған. Сонымен қатар Денсаулық сақтау министрлігі де дәрігерлер консилиумдарын ұйымдастыруға қатысып отыр.

Базарбек Нұржігіттің жағдайы тұрақтанғаннан кейін оның әрі қарайғы тексерілуі мен емделуіне көмектесуге дайын екенін айтты. Оның ішінде Астана мен Алматыдағы нейрохирургиялық орталықтарда ем қабылдау мүмкіндігі де қарастырылмақ.

Бұрынғы депутат қоғамды тергеу аяқталмай тұрып асығыс қорытынды жасамауға шақырды.

Ол қазіргі таңда ең бастысы зардап шеккен азаматтың денсаулығын қалпына келтіру екенін атап өтті. Базарбек сондай-ақ әлеуметтік желілерде тараған расталмаған мәліметтерге сенбеуге және оларды ары қарай таратпауға шақырды.

Айта кетейік, полиция жол апатының барлық мән-жайын анықтап жатыр. Қазіргі таңда іс бойынша тергеу жалғасуда. Сондықтан апаттың нақты себептері мен оған қатысушылардың жауапкершілігі туралы түпкілікті қорытындыны тергеу нәтижесі мен сот шешімі негізінде ғана жасауға болады.

Оқи отырыңыз:

• Бақытжан Базарбек жол апатына қатысты алғаш рет пікір білдірді
• Бақытжан Базарбек Жамбыл облысында адам қағып кетті ме? Полиция не дейді?
• Экс-депутат Базарбек қағып кеткен адамның жағдайы белгілі болды
• «Бұл арандату емес»: Бақытжан Базарбектің туыстары жол апаты туралы пікір білдірді