Бақытжан Базарбек Жамбыл облысында адам қағып кетті ме? Полиция не дейді?

15 тамыз, сенбі күні VIII шақырылымның Мәжіліс депутаты Бақытжан Базарбек Жамбыл облысындағы тасжолда адам қағып кетті деген ақпарат тарады. Жәбірленуші жансақтау бөлімінде жатыр, деп хабарлайды Orda.kz.

Жамбыл облысы полиция департаментінің баспасөз қызметі жол-көлік оқиғасы болғанын растады. Алайда полиция көлік тізгінінде болған адамның аты-жөнін жариялаған жоқ.

Жол-көлік оқиғасына қатысты Т. Рысқұлов аудандық полициясы қылмыстық іс қозғады.

«Алдын ала мәлімет бойынша, Toyota маркалы автокөліктің жүргізушісі, азамат Б., жолдың жүріс бөлігінде болған ер адамды қағып кеткен.
Жол-көлік оқиғасы салдарынан зардап шеккен азамат аудандық орталық аурухананың жансақтау бөліміне жатқызылды»,  деп хабарлады Жамбыл облысы полиция департаменті. 

Қазір полиция қызметкерлері оқиғаның барлық мән-жайын анықтап жатыр.

Бейресми ақпарат бойынша, тасжолда басқа бір көлік сиырды қағып кеткен. Бірнеше ер адам жолдағы малдың өлексесін алып тастауға әрекет жасап жатқан кезде, олардың бірін Бақытжан Базарбек басқарған деген болжам айтылып отырған көлік қағып кеткен.

Еске салсақ, депутат Бақытжан Базарбек 2026 жылғы 6 мамырда пленарлық отырыста жалған мемлекеттік нөмірлерді қолданғаны үшін жауапкершілікті күшейтуді ұсынған еді. Қазақстан ішкі істер министрлігі бұл мәселе қылмыстық заңнаманы қайта қарау аясында қарастырылып жатқанын мәлімдеді.

Оқи отырыңыз:

• Бақытжан Базарбек: Олигархтарға «сот төрелігі» ерекше
• Базарбек шенеуніктердің бос уәдесін сынады: ҚҚС жойылды, ұшақ билеті арзандады ма?
• Жалған мемлекеттік нөмір үшін қылмыстық жауапкершілік енгізілуі мүмкін