Атырауда тұтастай жоғалып кеткен отбасы мүшелерінің қашан өлтірілгені белгілі болды?

Атырау облысында Жангелдин ауылында Қарабалиндер отбасының түгелдей өлтірілуі бойынша тергеудің жаңа мәліметтері жарияланды. Күдікті күйеу баланың қайын жұртын қашан қырып салғаны белгілі болды, деп хабарлайды Orda.kz.

Прокуратураның мәліметінше, қылмыс әр айда жасалған екен. Отбасының кіші ұлы Наурыз мамыр айында, ал қалғандары қараша айында өлтіріліпті. 

«Тергеу барысында барлық жәбірленушілердің ас үй пышағымен салынған көптеген жарақаттары бар екені анықталды. Әрқайсысында алты және одан да көп жарақат тіркелген, оның ішінде кеуде, мойын және іш тұсында», — деді Атырау облысы прокурорының көмекшісі Жандар Болатбек.

Сонымен қатар, прокуратура сот-психиатриялық сараптама қорытындысы бойынша Сұлтан Сәрсемәлиев есі дұрыс деп таныды, өз әрекетіне есеп бере алатынын анықтады. Сондай-ақ, прокуратура мәліметінше, қылмыстық іс екі және одан да көп адамды өлтіру, мүлікті ұрлау деректері бойынша тергелуде. Іс материалдары мамыр айында сотқа жолдануы мүмкін.

Еске сала кетейік, Атырау облысында жұмбақ жағдайда жоғалып кетіп, 2 айдан кейін денесі табылған ерлі-зайыптылардың жерлеу рәсімі 8 қаңтар күні өтті. Ал осы отбасының тағы ұлы мен қызы басты күдікті Сұлтан Сәрсемалиев ұсталған соң табылған еді.

Оқи отырыңыз:

• Атыраудағы қанды іс: Күйеу бала отбасының төрт мүшесін өлтіргенін мойындады, әйелі психикалық орталықта жатыр
• Атырау облысындағы бүтін бір отбасының қасіреті: Күдікті мен әйеліне халықаралық іздеу салынды
• Атыраудағы қайын жұртын қырып тастаған күдіктіге ұрлық пен алаяқтық айыптары қосылды