Әскерден мүгедек болып қайтқан Ербаянның жағдайы жайлы тың дерек шықты

Әскерде жүріп жансақтау бөліміне түскен Ербаян Мұхтардың қазіргі жағдайы жайлы денсаулық сақтау министірлігі мәлімдеме жасады, деп хабарлайды Orda.kz.

Денсаулық сақтау министрі Ақмарал Әлназарова жауап берді.

«Ербаян Мұхтардың жағдайын денсаулық сақтау министрлігі бақылап отыр. Ербаянның ата-анасымен өзім кездестім. Жағдайы тұрақты. Күні кеше Ербаянды оңалту орталығына әкесімен бірге жатқыздық», — деді Ақмарал Әлназарова.

Еске сала кетейік, Ербаян Мұхтар басынан соққы алып, ауыр жарақаттың кесірінен төсекке таңылып, сал болып қалған еді. Orda.kz Ербаянның жақындарымен сұхбаттасқан болатын. Олар ұлдарына қастық жасалғанын, ауруханада рұқсатсыз миының бір бөлігін алып тастағанын айтқан еді. Сонымен қатар емге қаражат жоқ екенін де мәлімдеді. Осы жағдайдан кейін Қазақстан халқы Ербаянның еміне жылу жиды. Көптің арқасында сарбаз Түркияға аттанып, ота жасатып қайтты. 

Бұған дейін Orda.kz TikTok желісінде азаматтық киімдегі ер адамның Ұлттық гвардия әскери формасындағы адамға соққы жасап, оны қорлайтын сөздер айтып жатқан бейнежазбасы тарағаны жайлы жазған болатын.

Еске сала кетсек, өткен жылы 19 қыркүйекте Аягөз гарнизонының 10810 әскери бөлімінің лейтенанты Нұрсұлтан Алдамұратовтың денесі өзінің тұрғылықты жерінен табылды.

Ал 2024 жылы 9 қыркүйекте міндетті мерзімді әскери қызметті жоюға шақыратын петиция жарияланды. Ол Қазақстан Республикасының Қорғаныс министрлігіне жолданып, жақында болған әскерилердің қайғылы оқиғаларына байланысты көтеріліп отыр.

Ал Қазақстан Қорғаныс министрлігі бейбіт уақытта әскерилердің қаза болуы мен әскердегі әлімжеттік туралы қоғамдағы пікірлер шындыққа жанаспайды деп есептейді.