«Әскердегі әлімжеттік»: Желіде тараған бейнежазбаға қатысты тергеу ісі басталды

TikTok желісінде азаматтық киімдегі ер адамның Ұлттық гвардия әскери формасындағы адамға соққы жасап, оны қорлайтын сөздер айтып жатқан бейнежазбасы тарады. Бұл іске қатысты тергеу басталды, деп хабарлайды Orda.kz.

Orda.kz редакциясы «Батыс» РГК баспасөз қызметіне осы бейнежазбаға қатысты түсініктеме алу үшін хабарласты.

«2024 жылғы 23 қыркүйекте Батыс РГК әскери полициясы әскери қызметшілер арасындағы өзара қарым-қатынастардың жарғылық ережелерін бұзу туралы ҚР ҚК 440-бабының 1-бөлігі бойынша алдын ала тергеу бастады», деп мәлімдеді баспасөз қызметі.

Еске сала кетсек, 8 қыркүйек Ақтау гарнизонының 25744 әскери бөліміне мерзімді әскери қызметін өтеуге  жалғыз ұлын жіберген отбасына баланың мүрдесі қайтқан болатын. Марқұмның әкесінің айтуынша, ұлының өлімі кездейсоқ емес, офицер оның бетіне әдейі оқ атқан.

19 қыркүйекте Аягөз гарнизонының 10810 әскери бөлімінің лейтенанты Нұрсұлтан Алдамұратовтың денесі өзінің тұрғылықты жерінен табылды.

Ал 9 қыркүйек Міндетті мерзімді әскери қызметті жоюға шақыратын петиция жарияланды. Ол Қазақстан Республикасының Қорғаныс министрлігіне жолданып, жақында болған әскерилердің қайғылы оқиғаларына байланысты көтеріліп отыр.

Orda.kz тілшісі әскерден мүгедек болып қайтқан Ербаян Мұхтардың жақындарымен сұхбаттасқан болатын. 

Қазір Ербаян Мұхтардың ата-анасы баласын 23 қыркүйек, яғни дүйсенбіден бастап Астанадағы нейрохирургия орталығына жатқызуға келісті. Адвокаты Инга Иманбай «Министр уәде берген соң, ешкім қиянат жасамайды деп үміттенеміз. Дегенмен оның жағдайы қазір жақсы екенін ескертеміз» деп мәлімдеді.

Ал Қазақстан Қорғаныс министрлігі бейбіт уақытта әскерилердің қаза болуы және әскердегі әлімжеттік туралы қоғамдағы пікірлер шындыққа жанаспайды деп есептейді.