Қаржылық пирамидалар 8 млрд теңгеден асқан қаражатты шетел асырған

Биыл қазақстандық қаржы пирамидаларына 8 млрд теңгеден аса қаражат құйылған. Соған қарамастан ел ішінде оңай пайдаға кенелгісі келетіндер азаяр емес, деп хабарлайды Астана арнасы.

«Арыз жазайық десек ол компаниялар Қазақстанда тіркелмеген шетелдік компания болып шықты, бас кеңсесі Украинада екен. Олар ақшамызды қайтарып береміз деп уәде берген болды. Бірақ әлі күнге дейін бір тиын бермеді», - дейді Алматы қаласының тұрғыны Бақытжан Жүнісбеков.

Ол осыдан бірнеше жыл бұрын талай адамды қақсатқан қаржы пирамидасына 1000 еуро салыпты. Бүгінде алданғанын біліп, сан соғып отыр. Ендігі жерде шетелдік алаяқтар қаражатты қайтарады, олар жауапсыз қалмайды дегенге мүлде сенбейді.

Аталмыш компанияға біздің елден 1 миллиардтан астам қаржы аударылған.

Бұл - алаяқтық фактінің бір ғана көрінісі екен. Ішкі істер министрлігінің мәліметінше, қазіргі уақытта қаржы пирамидасынан зардап шеккендердің саны 40 мыңнан да асады.

Шетел асып, көзден ғайып болған қаражат бүгінде 8 млрд 300 миллион теңгеден асып отыр. Қаржыгерлер пирамиданың бірнеше айқын белгілеріне мән беріп, қаржы құюда абай болуға шақырады. Күмәнді мекемелерге қаражат аударудан аулақ болып, қаржылық сауттылыққа басымдық беру қажет.

«Қаржылық пирамида өкілдері аз уақытта көп ақша береміз деп сенімді түрде айтады. Ешқандай қауіп-қатер туралы сөз болмайды. Олардың ұсынатын пайыздық үстемақылары да тым жоғары. Өзіңнен кейін адам тіркелсе, одан көп ақша аласың деп уәде береді. Дәл осы белгілерге қарап, сақ болу керек», - дейді еліміздің қаржы нарығын реттеу және дамыту агенттігінің бас маманы Дмитрий Акмаев.