Алматыда саяси қуғын-сүргін құрбандарын еске алды

Саяси қуғын-сүргін мен аштықтан зардап шеккендерді еске алу акциясы таңертең Қарағайлы саябағындағы ескерткіш мемориалының жанында өтті, деп хабарлайды Orda.kz тілшісі.

Ол үшін төңірек таспамен қоршалып, отыратын орындықтар қойылды.

Келген адамдардың көбі гүл ала келген, олар суретке түсті, өзара сөйлесті. Ресми салтанатты түрде ешкім баяндама жасап, сөз арнаған жоқ.

Бір адам Аарон Атабектің суреті салынған үш портрет көтеріп келіп, қазіргі Қазақстанда саяси еркіндіктің «өркендеп» кете қоймағанын білдіргісі келді.

«Ақ Жол» партиясының өкілдері келіп құрбандарға арнайы Құран бағыштады.

Айта кетерлігі, былтыр белсенділер көбірек қатысып, саяси қуғын-сүргін құрбандары мен еліміздегі қазіргі саяси ахуалға қатысты өткір де ащы мәлімдеме жасаған болатын. Биыл ондай жағдай байқалмады.

Бұл жолы бәрі тыныш әрі бірсарынды өтті.  Халық көп болған жоқ. Негізінен бір мезгілде 30 адамнан аспайтын топ жиналды.

Акцияға қатысқандар адамдардың аз келгеніне наразы болып, басқа азаматтық белсенділердің неге келмегеніне таң қалғандарын жасырмады. Олар қазіргі қоғам мен саяси белсенділіктің бәсең екенін жазғырды.

Келгендердің көбі халықтың көп жиналмағанына қарамастан басынан аяғына дейін қатысып, белсенділік танытты. Кейбіреулері келіп, гүл шоқтарын қойып, тағзым етіп, бірден кетіп қалып жатты. Ешқандай ерекше пікір мен саяси ұрандар айтылған жоқ. 

Жақында саяси қуғын-сүргін мен ашаршылық құрбандарын еске алу күні қарсаңында Қарағанды қаласында қоғам белсенділері Бақытжан Жансейітов пен Болатбек Тоқмырза ұсталып, 15 тәулікке әкімшілік қамауға алынды.

Алматыда 31 мамыр күні «Almaty Theatre» ғимаратында болуы керек саяси қуғын-сүргін мен ашаршылық құрбандарын  еске алуға арналған концерт өтпей қалды. 

Былтыр дәл осы күні президент саяси қуғын-сүргін және ашаршылық құрбандарын еске алу күніне байланысты жазба жариялаған болатын.

Биыл ел президенті Қасым-Жомарт Тоқаев саяси қуғын-сүргін құрбандарына арналған «АЛЖИР» мұражай-мемориалдық кешеніне барып, гүл шоқтарын қойып, тағзым етті. Артынша ол АЛЖИР мұражай-мемориалдық кешені экспозицияларын аралады.