Президент саяси қуғын-сүргін құрбандарына арналған «АЛЖИР» мұражай-мемориалдық кешеніне барды

Бүгін, 31 мамырда, Қазақстанда аталып өтілетін саяси қуғын-сүргін және ашаршылық құрбандарын еске алу күніне орай Мемлекет басшысы мемориалға гүл шоқтарын қойып, қаза тапқандарды бір минут үнсіздікпен еске алды, деп хабарлайды Orda.kz.

Одан кейін Қасым-Жомарт Тоқаев саяси қуғын-сүргін және ашаршылық құрбандарын еске алуға арналған шарада жиналғандар алдында сөз сөйледі.

«Біз жыл сайын 31 мамырда саяси қуғын-сүргін мен ашаршылық құрбандарын еске алып, сол қаралы жылдары қаза тапқандардың рухына тағзым етеміз», – деді Президент. 

Президент өткен ғасырда Кеңес Одағы құрамына кірген көптеген халықтар ауыр сынақтарға тап болғанын еске салды.

«Қиын тағдыр қазақ халқынан да айналып өтпеді. Еріксіз ұжымдастыру науқаны кезінде адамдар малынан, мүлкінен айырылды, аштықтан жаппай қырылды, көпшілігі шетел асуға мәжбүр болды. Мыңдаған адам «халық жауы» атанып, қатігездікпен азапталды, сотсыз, тергеусіз атылып кетті», – деді ол. 

Қазақстан аумағында ГУЛАГ жүйесіне кіретін 11 лагерь болды. АЛЖИР – сондай қасіретті орындардың бірі. Бұл жерде 8 мыңға жуық жазықсыз сотталған әйел жазасын өтеді.

«Саяси қуғын-сүргін тек қазақ халқына ғана емес, басқа этностарға да ауыр тиді. АЛЖИР-де 60-тан астам ұлттың өкілдері қамауда болды. Сондықтан сол зұлмат заманда зардап шеккен барлық халықтар бұл трагедиядан сабақ алуы тиіс. Мұндай зұлмат ешқашан қайталанбауы керек. Бұл тек өзімізге байланысты. Өткеннің қасіретті кезеңдерін еске алудың басты мәні – осы», – деп қорытындылады сөзін Президент. 

Сөзінің соңында Қасым-Жомарт Тоқаев Қазақстанға бейбітшілік пен амандық тіледі.

2024 жылдың осы күні Қасым-Жомарт Тоқаев өзінің Twitter-дегі ресми парақшасында жазба жариялап, онда өткеннен сабақ алған ел ғана болашақтың сын-қатерлеріне төтеп бере алатынын атап өтті.