Саяси қуғын-сүргін құрбандарын еске алу қарсаңында қарағандылық екі белсенді қамалды

Саяси қуғын-сүргін мен ашаршылық құрбандарын еске алу күні қарсаңында Қарағанды қаласында қоғам белсенділері Бақытжан Жансейітов пен Болатбек Тоқмырза ұсталып, 15 тәулікке әкімшілік қамауға алынды, деп хабарлайды Orda.kz.

Бейресми ақпаратқа сәйкес, оларға қоғамды бір әрекетке шақырды деген айып тағылған.

Бұл жайлы Қарағанды қаласындағы қоғам белсендісі Айтқожа Фазыл Facebook парақшасында мәлімдеді. Ол былай деп жазды:

«Саяси қуғын-сүргін мен ашаршылық құрбандарын еске алу күні алдында Қарағандылық белсенділер Бақытжан Жансейітов пен Болатбек Тоқмырза не үшін 15 тәулікке қамалды? Қуғын сүргін үрдісі  — «Черный воронок» жаңаша жалғасуда ма? Олардың жазығы не? Кім ресми жауап береді?», — деді Айтқожа Фазыл.

Қазіргі таңда жергілікті билік пен құқық қорғау органдары бұл іске қатысты ресми түсініктеме берген жоқ. Қамауға алынған белсенділердің жақтастары олардың еске алу шарасына қатыспақ болғанын, ешқандай заң бұзбағанын айтады.

Еске сала кетсек, 31 мамыр күні «Almaty Theatre» ғимаратында болуы керек саяси қуғын-сүргін мен ашаршылық құрбандарын еске алуға арналған концерт өтпейтін болды. Еркеш Шәкеев ұйымдастырмақ болған концертте Алаш жинағының тұсаукесері өтуі керек болған. Бұл ашаршылық құбандары мен репрессия кезінде қудаланған қазақ зиялыларына арналған ауқымды шара болатын еді.