Алматыда Құранға тіл тигізген 23 жастағы келіншек өкінетінін айтып, кешірім сұрады.
Қалалық полиция басқармасының хабарлауынша, әлеуметтік желілерде жүргізілген мониторинг кезінде мас әйелдің Құранды балағаттап жатқан видеосы анықталды.
– Тексеру шаралары барысында кінәлі адам анықталды. Бұл бұрын Қазақстан Республикасының көші-қон заңнамасын бұзғаны үшін әкімшілік жауапкершілікке тартылған 23 жастағы азаматша Т., сондай-ақ 25 жастағы азаматша Л. Олардың әрекеттері «Дінге сенушілердің сезімін қорлау» бабы бойынша есепке алынды. Шешім қабылдау үшін материал қалалық Дін істері басқармасына жіберіледі, – деді Алматы қаласы Экстремизмге қарсы іс-қимыл департаментінің басшысы Мәулен Қасымжан.
Ведомство құқық бұзушының өкінетінін және Қазақстан халқынан кешірім сұрағанын атап өтті.
– Шағын дастархан жайылып, ішімдік іштік. Мен мас болып еріксіз әрекет жасадым: қасиетті Құран кітабын қолыма алып, парақшама видео түсірдім. Мен өз кінәмді білемін. Мен бүкіл жамағаттан, мұсылмандардан кешірім сұрағым келеді. Мен дінді қатты құрметтеймін. Бұл енді ешқашан қайталанбайды. Мен шын жүректен кешірім сұраймын, – деді азаматша Т.
