Алматыда метро желісі «Алтын-Орда» базарына дейін ұзартылады. Бұл туралы «Алматы қаласын дамытудың өзекті мәселелері» тақырыбында өткен баспасөз мәслихатында қала әкімінің орынбасары Серік Құсайынов мәлімдеді.

«Метро бойынша өте жақсы жоба жасалып жатыр. Метро желісінің жаңа желісі «Алтын-Орда» базарына жетеді – бұл біздің батыс қақпамыз. Ол жерде метро мен автобус желілері қосылатын көлік торабы болады. Яғни, бұл өте маңызды түйін» деді Құсайынов.

Оның айтуынша, Алматы метросын салу жобасы өзгертіліп, бекітілген.

«Енді метро желісі Қалқаман жақтан өтпейді, ол батысқа – жаңа Наурызбай ауданы арқылы Алатау көшесіне қарай түседі. Қосымша екі станса салынады, ал соңғы станция «Алтын-Орда» базарында болады» деп түсіндірді Серік Құсайынов.

Осылайша, қала әкімінің орынбасары Наурызбай ауданын – қаланың батыс бөлігін орталықпен байланыстыру жоспарлануда екенін алға тартты.

«Ал Наурызбай өңірінде тұратын 150 мыңға жуық адамды тасымалдауға тиімдірек болады» деген сенім білдірді Серік.

Бұған дейін ол Алматыда қоғамдық көлікте жол жүру құны көтерілуі мүмкін екенін айтқан болатын.

Бөлісіңіз: