АҚШ пен Иран бейбіт келісімнің соңғы нұсқасын келісіп жатыр

Бұл туралы Пәкістанның премьер-министрі Шахбаз Шариф мәлімдеді. Оның айтуынша, Исламабад қазіргі уақытта екі елмен де тығыз байланыста жұмыс істеп, соңғы қадамдарды анықтауда, деп хабарлайды Orda.kz.

«Бейбітшілік дәл қазіргідей жақын болған емес» деп жазды Шахбаз Шариф Х әлеуметтік желісінде. 

Бұған дейін кейбір ирандық БАҚ екі ел арасындағы болашақ «өзара түсіністік туралы меморандумның» негізгі тармақтарын жариялаған болатын:

• Соғысты барлық бағытта, соның ішінде Ливанда да дереу әрі түпкілікті тоқтату;
• Иранды қалпына келтіруге арналған кемінде 300 миллиард долларлық америкалық қаржыландыру бағдарламасын әзірлеу;
• АҚШ-тың Иранның ішкі істеріне араласпау міндеттемесі;
• 30 күн ішінде АҚШ-тың теңіз блокадасын алып тастауы және шекара маңындағы күштерін шығаруы, ал Иранның Ормуз бұғазын қайта ашу;
• 60 күн ішінде ядролық бағдарлама мен барлық америкалық санкцияларды жою жөнінде келіссөздер өткізу;
• АҚШ-тың Иранның бұғатталған 24 миллиард доллар активін босатып, оның жартысы ядролық келіссөздер басталғаннан кейін қайтару;
• Келісімнің орындалуын бақылайтын арнайы бақылау тетігін құру.

Кейін Дональд Трамп бұл ақпараттарды шындыққа жанаспайды деп, жазбаша келісілген шарттарға еш қатысы жоқ жалған мәлімет екенін мәлімдеді.

«Біз өте адал емес адамдармен жұмыс істеп отырмыз. Олармен адал түрде келісім жасау мүмкін емес. Бұған қоса, олардың кеше түнде Ормуз бұғазынан шығып бара жатқан үнді кемелеріне жасаған дрон шабуылы толық тойтарылғанымен, мүлде қабылдауға болмайтын әрекет. Олар тез арада өздерін қолға алғаны дұрыс!» деп жазды ол. 

Иранның сыртқы істер министрі Аббас Арагчи БАҚ өкілдерін Исламабадтағы «өзара түсіністік туралы меморандумның» мазмұнына қатысты алып-қашпа әңгімелерден бас тартуға шақырды. Оның сөзінше, құжат бұрын-соңды болмағандай аяқталуға жақын, ал оның егжей-тегжейі тиісті уақытта жарияланады.

Бұған дейін Трамп АҚШ пен Иран арасындағы қақтығысты тоқтатуға бағытталған келісім осы демалыс күндері-ақ қол қойылуы мүмкін екенін айтқан еді.

Оқи отырыңыз:

• Трамп: Иранмен келісім осы демалыс күндері жасалуы мүмкін
• Мәскеу соты Мәсімовтің бұрынғы күйеу баласына халықаралық іздеу жариялады
• Үйіндегі шкафта есірткі өсірген балшы ұсталды