Мәскеу соты Мәсімовтің бұрынғы күйеу баласына халықаралық іздеу жариялады

Мәскеуде Мәсімовтың бұрынғы күйеу баласын басқа бір қазақстандық қашқынның арызы бойынша сырттай қамауға алды. Мәскеу соты кәсіпкер Азамат Қапенов пен оның ағасы Медер Қапеновті сырттай қамауға алды. Екеуі де халықаралық іздеуге жарияланды, деп хабарлайды Orda.kz.

Ресейлік БАҚ мәліметінше, ағайындылар Қазақстандағы «ПТД» ЖШС-нің 25 пайыз үлесін жымқырды деп айыпталған. Тергеу нұсқасы бойынша, олар кәсіпкерге корпоративтік дауларды реттеп береміз деп уәде берген, дегенмен бастапқыда-ақ міндеттемелерін орындауды көздемеген. Келтірілген шығын 52 млн рубльге (350 млн теңгеден астам) бағаланған. Бұл оқиғадағы «жәбірленушінің» кім екені ерекше назар аудартады. Анатолий Балушкин — «Азия Авто» және «Бипэк Авто» компанияларының негізін қалаушы, 2020 жылғы Forbes бағалауынша, 153 млн доллар дәулеті бар Қазақстандағы ірі кәсіпкерлердің бірі.

Қазақстанда оның өзі 230 млрд теңгеден астам қаржыны жымқыру ісі бойынша іздеуде жүр. Қаржы мониторингі агенттігінің нұсқасына сәйкес, Балушкин мен «Азия Авто» компаниясының бас директоры Ерік Сағымбаев банктік несиелер мен салықтарды төлеуден жалтару үшін қаражатты сыртқа шығарған. Тергеу мәліметінше, бұл қаражат 50 пайыздық локализациясы бар автокөлік құрастыру зауытын салуға бағытталуы тиіс болған, алайда мұндай зауыт салынбаған.

Қазақстан құқық қорғау органдарының мәліметінше,  Балушкин Ресейге қашып кеткен. Оған қатысты қылмыстық іс 2021 жылдың ақпанында қозғалып, сол жылдың 15 шілдесінде ол Ресей азаматтығын алған. 30 шілдеде халықаралық іздеуге жарияланған. Ресейдің Бас прокуратурасы оны экстрадициялаудан бас тартты, себебі ол енді РФ азаматы. Сонымен бірге, Қапеновтің адвокаты Жанна Александрова бұл азаматтықтың заңдылығына күмән келтіреді. Азаматтық алуға өтініш берген кезде шетелдегі қылмыстық қудалау туралы көрсету қажет, ал Балушкин бұл ақпаратты жасырған болуы мүмкін.

Азамат Қапенов — бұрын сотталған ҰҚК-нің экс-төрағасы Кәрім Мәсімовтің бұрынғы күйеу баласы. Ол 2015 жылы Мәсімовтің қызы Тамила Кәрімге үйленген, ал 2022 жылдың қаңтарында қайын атасы ұсталғаннан кейін олардың ажырасқаны белгілі болды. Екі жылдан астам уақыт бойы бұрынғы жұбайлар Мәскеуде мүлік пен балаларға қамқорлық мәселесі бойынша соттасқан.

Қазақстанда Қапеновтің өзіне қатысты да заң тұрғысынан мәселелер бар. Қаржы мониторингі агенттігі оның «ҚазТемірТранс» компаниясының вице-президенті болған кезінде аффилирленген компанияларға жүк вагондарымен жұмыс істеуде заңсыз артықшылықтар бергені туралы істі тергеп жатыр. Келтірілген шығын 5,2 млрд теңгеден асады. 2026 жылдың сәуірінде сот Қытаймен шекарадағы «Достық» станциясындағы оның терминалын тәркіледі.

Қапенов 2025 жылдың тамызында БАӘ-де ұсталған, алайда бір айдан кейін босатылған. Әмірліктер оны экстрадициялаудан бас тартты. Адвокатының айтуынша, Қапенов Дубайда тұрып жатыр және жасырынбай, ашық жүріп-тұрады.

Бұл оқиғада сұрақ көп. Қазақстанда іздеуде жүрген Балушкин Ресей сотында жәбірленуші ретінде танылып, Қапеновтерді қамауға алуға қол жеткізген. Бір істе ол іздеуде болса, екіншісінде — жәбірленуші. Дәл оның арызы негізінде Қазақстанда да Қапеновке қарсы іс қозғалған. Неліктен тергеу органдары Балушкиннің Ресей азаматтығын алу заңдылығын дауламай отыр — бұл сұрақ әзірге жауапсыз қалып отыр.

Оқи отырыңыз:

• Кәрім Мәсімовтің бұрынғы күйеу баласы Азамат Қапенов қазақстандықтарға мәлімдеме арнады
• 5,2 млрд теңгеден астам шығын келтірген: Мәсімовтің бұрынғы күйеу баласына қатысты істің мән-жайы белгілі болды
• Миллиард болатын дау: Мәсімовтің қызы бұрынғы күйеуіне зәулім сарайды беруге мәжбүр болды