Үйіндегі шкафта есірткі өсірген балшы ұсталды

Астанада таро картасымен бал ашатын әйелдің жатын бөлмесінде жүргізілген тінту қылмыстық іске ұласты. Елордада полиция тағы бір үй жағдайында ұйымдастырылған есірткі плантациясын анықтады, деп хабарлайды Orda.kz.       

Анықталғандай, Астана қаласының 54 жастағы тұрғыны өзін таролог ретінде таныстырып, пәтерінде шағын фитозертхана ұйымдастырған.

Полиция мәліметінше, әйел есірткі құрамдас өсімдіктерді өсіру үшін жатын бөлмедегі шкафты арнайы жабдықтаған. Ол жерге жасанды жарық шамдарын және басқа да қажетті құрылғылар орнатқан.

«Тінту барысында полицейлер бірнеше марихуана бұтасын, сондай-ақ оларды өсіруге арналған құрал-жабдықтарды анықтап, тәркіледі», – деп хабарлады тәртіп сақшылары.

Сонымен қатар медициналық тексеру нәтижесінде әйелдің есірткіге мас  болғаны белгілі болды. Аталған факті бойынша қылмыстық іс қозғалды. Табылған өсімдіктер мен құралдар тәркіленді.

Полиция дерегіне сәйкес, жыл басынан бері заңсыз айналымнан 70 келіден астам түрлі есірткі заттары алынған. Сондай-ақ бір есірткі зертханасы мен бес фитозертхананың қызметі тоқтатылды. Бұдан бөлек, құқық қорғау органдары 500-ге жуық есірткі құқықбұзушылығын анықтап, оның ішінде 161 дерек бойынша тыйым салынған заттарды сату фактісін тіркеген.

Жақында Алматыда полиция қызметкерлері тұрғын үйдің жертөлесінен жасырын есірткі плантациясын анықтады. Полицейлер өсімдіктерді өсіру және оларды сатуға дайындау үшін қолданылған жабдықтарды тәркіледі, олардың ішінде жарық беру құрылғылары, электронды таразылар, вакуумды қаптау құрылғысы және температураны бақылау құралдары бар.

Оқи отырыңыз:

• Кәмелет жасына толмаған есірткі таратушы төрт жарым жылға сотталды
• Алматыда тұрғын үй жертөлесінен жасырын есірткі плантациясы табылды
• Қазақстанда 13 тоннаға жуық есірткі тәркіленді