Трамп: Иранмен келісім осы демалыс күндері жасалуы мүмкін

АҚШ президенті Дональд Трамп Иранмен келісім «осы демалыс күндері жасалуы мүмкін» екенін мәлімдеді, деп хабарлайды Orda.kz.

Оның айтуынша, екі ел арасындағы шиеленісті тоқтатуға бағытталған келісімге Еуропада қол қойылуы ықтимал. Алайда америкалық көшбасшының өзі бұл рәсімге қатыспайды.

«Мен қатыса алмаймын, бірақ Джей Ди Вэнс сонда болады», — деді ол. 

Трамптың сөзінше, қол жеткізілген уағдаластықтар Әли Хаменеи тарапынан да мақұлданған. Осыған байланысты ол бұған дейін ескерткен әскери соққыларды тоқтатқанын айтты.

Ал Иран Сыртқы істер министрлігі бұл мәлімдемелерді растаған жоқ. Ведомство өкілі Исмаил Багаи мұндай сөздерді «алыпсатарлық» деп атады.

«Біз мәтіннің негізгі бөлігі іс жүзінде келісілгенін айтқанбыз. Бірақ мәселе америкалық шенеуніктердің әр жолы жаңа талап қоюынан немесе өз ұстанымдарын өзгертуінен туындайды. Бұл өзгерістер олардың өкілдері арқылы да, БАҚ-қа берген көптеген сұхбаттары арқылы да айтылды», — деді дипломат. 

АҚШ пен Иран арасындағы қарым-қатынас соңғы онжылдықта айтарлықтай күрделі болып келеді. 2015 жылы екі тарап Иран ядролық келісімі (JCPOA) аясында келісімге келген еді. Бұл құжат Иранның ядролық бағдарламасын шектеуге бағытталған болатын.

Алайда 2018 жылы Трамп әкімшілігі бұл келісімнен біржақты түрде шығып, Иранға қарсы санкцияларды қайта енгізді. Содан бері тараптар арасында сенімсіздік қалыптасып, келіссөздер бірнеше рет үзіліп, қайта жанданған.

Соңғы келіссөздерде санкцияларды жеңілдету, ядролық бағдарламаны шектеу,  өңірлік қауіпсіздік мәселелерін қамтитын ұсыныстар болған.  Сарапшылардың пікірінше, егер келісімге шынымен қол қойылса, бұл Таяу Шығыстағы шиеленісті азайтып, мұнай нарығына да әсер етуі мүмкін.

Оқи отырыңыз:

• Трамп Қазақстаннан баратын тауарға 25% баж салығын енгізді
• Трамп пен Си Цзиньпин Бейжіңде келіссөз өткізді
• Трамп Нетаньяхуға Иранмен соғыста жалғыз қалатынын ескертті