Желіде балаларға жасырын екпе салынатыны туралы ақпарат тарауда

Қазақстандықтар мектеп оқушылары ата-аналардың келісімінсіз Pfizer/BioNTech өндірген вакцинамен егілетіні туралы көп сөз қозғалуда. Бала үйде вакциналанғаны туралы айтпауы үшін препарат мұрынға арналған спрей түрінде болады, деген қауесет тарап жатыр. Бұл өтірік деп хабарлайды stopfake.kz.

Жаңа оқу жылы басталар алдында әлеуметтік желіде, әсіресе ата-аналар чатында осындай үрейлі әңгімелер көп тарап, жұрттың зәресін ұшыруда.

Бұл ақпаратты денсаулық сақтау министрлігі жоққа шығарды.

— Бұл ақпарат шындыққа жанаспайды. Біріншіден, Pfizer/BioNTech өндірген вакцинаны Қазақстанға 2021 жылдың төртінші тоқсанында жеткізу жоспарланған. Екіншіден, ол тек иненің көмегімен бұлшықетке егіледі. Бұл препарат 12 жастан асқан жасөспірімдерге арналған. Естеріңізге сала кетейік, Қазақстанда балаларды вакцинациялау тек ата-аналардың немесе ресми өкілдердің (қамқоршылардың) ақпараттандырылған келісімімен ғана жүргізіледі , – деп хабарлады ведомстводан.

Бұл екпені алғаннан кейін балалар жаппай өледі деген де қауесет. Pfizer/BioNTech өндірген COVID-19 алдын алуға арналған препарат барлық қажетті клиникалық және клиникаға дейінгі сынақтардан өтті, оның қауіпсіздігі мен тиімділігі дәлелденген.

Аталған екпе АҚШ-тың Азық-түлік және дәрі-дәрмек сапасын санитарлық қадағалау басқармасымен мақұлданған және АҚШ, Канада, Австралия, Бельгия, Франция, Исландия және т.б. 98 елде қолданылуда. Оны қолдану нәтижесінде жаппай өлім анықталған да,  тіркелген де  жоқ.