Алаяқ азаматтарға жүргізуші куәлігін алып беремін деп уәде беріп, алдаған

Азаматтарға жүргізуші куәлігін алып беремін деп уәде беріп, алдаған алаяққа қатысты Меркі аудандық соты бірнеше рет жасалған алаяқтық фактісі бойынша істі қарады, деп хабарлайды Orda.kz.       

 Меркі аудандық соты азамат М.-ға қатысты қылмыстық істі қарады (ҚК 190-бабы 3-бөлігінің 4) тармағы).

Сотталушы таныстары арасында емтихан тапсырмай жүргізуші куәлігін алу мүмкіндігі туралы ақпарат таратқан. 2025 жылдың тамыз айында сотталушы азаматтардың сенімін асыра пайдаланып, жүргізуші куәлігін дайындап беремін деген сылтаумен үш жәбірленушіден жалпы 770 мың теңге ақшалай қаражат алған.

Осылайша, жәбірленушілердің екеуіне әрқайсысына 300 мың теңгеге, ал үшінші жәбірленушіге 170 мың теңгеге жүргізуші куәлігін ресімдеуге уәде берген. Алынған ақшаны М. жеке мақсатына пайдаланып, содан кейін байланысқа шығуды тоқтатқан.

Кінә сотталушы мен жәбірленушілердің айғақтарымен, сондай-ақ, қылмыстық істің басқа да материалдарымен дәлелденді.

Прокурор сотталушыға 2 жыл 6 ай мерзімге бас бостандығынан айыруды тағайындауды сұрады.

Ол кінәсін толық мойындап, жасаған ісіне өкініш білдіріп, қарыз міндеттемелеріне байланысты қылмыс жасағанын түсіндірді. Жәбірленушілерге материалдық залал толық көлемде өтелді.

Жәбірленушілер сотқа сотталушымен татуласқандары және шағымдарының жоқтығы туралы хабарлады.

Сот үкімі ол ҚК 190-бабы 3-бөлігі бойынша жымқырылған мүліктің 2 еселенгеннен 3 еселенгенге дейінгі мөлшерінде айыппұл салу не 3 жылдан 7 жылға дейінгі мерзiмге бас бостандығын шектеу не айыру түріндегі негізгі жазаны көздейді.

Сот кінәні мойындағанын, жасаған ісіне өкініш білдіргенін, материалдық залалды ерікті түрде өтегенін, жәбірленушілермен татуласқанын, сондай-ақ ауырлататын мән-жайлардың болмауын жеңілдететін мән-жай ретінде таныды.

Сот үкімімен М. ҚК 190-бабы 3-бөлігінің 4) тармағы бойынша кінәлі деп танылып, оған пробациялық бақылау белгілей отырып, 3 жыл бас бостандығын шектеу түріндегі жаза тағайындалды.

Үкім заңды күшіне енді.

Оқи отырыңыз:

• ҚТЖ топ-менеджменті бір жылда бір миллиард теңгеден астам сыйақы алды
• Санжар Боқаев 18 маусымға дейін қамауда қалады
• Елімізде биыл алғашқы тоқсанда 77 трансплантация жасалды