Жаңаөзенде дене шынықтыру пәнінің мұғалімі мектеп оқушыларын соққыға жыққан

Жаңаөзен қаласындағы №5 мектеп-гимназиясында дене шынықтыру пәнінің мұғалімі оқушыларға қол көтерді. Мектеп оқушылары мұғалімнің қол жұмсаған сәттерін видеоға түсіріп, желіде жариялады.

Жаңаөзен қалалық білім бөлімі бұл істің ерекше бақылауға алынғанын хабарлады.

«Қазіргі таңда арнайы комиссия құрылып, тексеру қорытындысы бойынша аталған құқық бұзушылықтарға жол берген тұлғаларға қатаң шара қолданылатын болады» деп атап өтті білім басқармасынан.

Маңғыстау облыстық полиция департаментінің баспасөз қызметі бұл оқиға бойынша Қылмыстық кодекстің 140-бабының 2-бөлігі бойынша сотқа дейінгі тергеу басталғанын хабарлады.

Порталдың хабарлауынша, қамқорлығындағыларға қол көтерген дене шынықтыру пәнінің мұғалімі 160 АЕК көлемінде айыппұл төлеуі немесе 40 тәулікке дейін қамауға алынуы мүмкін.