Жамбыл облысы ТЖД қызметкері: полковник бізге жарылатын зат жоқ деді

Жамбыл облысындағы әскери қоймада болған жарылыстан аман қалған өрт сөндірушілер журналистерге сұхбат берді. Белгілі болғандай әскери бөлімдегілер қоймада жарылатын ештеңе жоқтығын айтқан.

Қауіп-қатерден бейхабар өрт сөндірушілер оқ -дәрі қоймасын сөндіруге кіріскен. Көп ұзамай жарылыс болған.

Бұл туралы бейнежазба кеше журналист Ирина Советжанқызының әлеуметтік желідегі парақшасында жарияланды.

— Алмаз — жарылыстан құдай сақтап, аман қалған өрт сөндіруші. «Жарылатын зат жоқ деп басшыларымызға айтты, олар да алданып қалған сияқты» — дейді. Ал, әскерилер шегіне бастаған. Мен кеше жағдайын айтқан, жарақаты ауыр жігіт осы, - деп жазды Ирина Советжанқызы.

Сонымен қатар журналист өрт сөндіру қызметі қарауыл бастығының сөзін келтіре отырып, бүгінгі жазбасында ақпаратты толықтыра түскен.

— Алдыңғы видеодағы Алмаздың, «қарауыл бастығы айқайлап мені тауып алып, цементтің артына тастап, келесісін құтқаруға кетті» деген азамат осы — қарауыл бастығы Мұхамеджанов. Өрт сөндірушілердің алғашқысы болып, оқиға орнына барған. «Бара сала барлау жасаймыз, старшина кім деп сұрап, жарылатын зат бар ма деп сұрадым, жоқ, — деді». Алғашқы дауыстар шыға бастағанда, тағы сұраған. Жоқ, деген жауап алыпты». Тоқтаусыз су келсе де, ол өртті өшіре алмас едік. Жарылғыш зат бар жерге бізді жақындатпауы керек еді» — дейді Байзақ ауданы, 8-өрт сөндіру қызметінің қарауыл бастығы Асыл Мұхаметжанов.

Бейнежазба Ирина Советжанқызының Facebook парақшасында.