Қызылорда мұнайшылары жалақыны көтеруді талап етіп отыр

Қызылорда облысындағы «Қуатамлонмунай» мұнай компаниясының 300-ден астам жұмысшысы жалақыны көтеруді талап етуде.

Бұл туралы Orda.kz Азаттыққа сілтеме жасап хабарлады.

Мұнайшылардың айтуынша, қазір олар айына орта есеппен шамамен 110 мың теңге алады.

– Біз жалақыны кем дегенде 250 мың теңгеге дейін көтеруді талап етеміз. Біздің арамызда 90 мың алатындар да бар, - деді жұмысшылардың бірі.

Жұмысшылар Қазақстан Президенті Қасым-Жомарт Тоқаевқа, Энергетика министрі Нұрлан Ноғаевқа және Қызылорда облысының әкімі Гүлшара Әбдіқалықованың атына үндеу жазды.

– Азық-түлік тауарларының қымбаттауы, нарықтағы бағаның өсуі айтарлықтай әсер етеді. 2017 жылдан бастап жалақы өскен жоқ. Өткен жылдың 24 қарашасында біз кәсіпорын басшылығына жалақыны көтеру туралы ұжымдық хат жолдадық. Бірнеше кездесулер болды. 2021 жылы 5 қаңтарда облыс әкімінің өкілі мен еңбек инспекциясы басшысының, кәсіподақ төрағасының қатысуымен жиналыс өтті. Бірақ бәрі нәтижесіз, -делінген үндеуде.

Үндеуді 350-ден астам адам қолдады.

«Қуатамлонмунай» Қызылордадан 160 шқ қашықтықтағы кен орнынан мұнай өндіреді. Компания кен орындарын барлаумен, мұнай өнімдерін сатумен айналысады. Компанияны Қытай азаматтары басқарады. Ашық ақпарат көздерінен алынған мәліметтер бойынша, Сун Хуайю қазақстан-қытай кәсіпорнын басқарады.