Ресейде жаңа заң: шетелдегі ресейліктерді қорғау үшін президентке әскер қолдану құқығы берілмек

Ресей мемлекеттік думасының депутаттары президенттің шешімімен шетелде қудалауға ұшыраған ресейліктерді қорғау үшін қарулы күштерді қолдануға мүмкіндік беретін заң жобасын бірінші оқылымда қабылдады, деп хабарлайды Orda.kz РБК-ға сілтеме жасап. 

Заң жобасын 413 депутат қолдап дауыс берген. Қарсы тарап немесе қалыс қалғандар болмаған.

Қорғаныс министрінің орынбасары әрі мемлекеттік хатшы Анна Цивилева заң жобасын таныстыра отырып, оның мақсаты – басқа мемлекеттердің аумағында ресей азаматтарын «қылмыстық және өзге де қудалаудан» қорғаудың құқықтық негізін қалыптастыру екенін айтты. 

Қосымша баяндамашы, қорғаныс комитетінің төрағасы Андрей Картаполов бұл нормалар ресей азаматтарының құқықтарын, сондай-ақ ресейлік ұйымдарды «шетелдік заңсыз әрекеттерден» қорғауға ықпал ететінін айтты. Ол АҚШ-та да ұқсас заң 2002 жылы қабылданғанын айтты. 

Заң жобасында әскердің нақты қалай қолданылатыны көрсетілмеген.

Қазір шетелде әскер қолдану үшін президентке Федерация кеңесінің рұқсаты қажет. Дәл осындай рұқсат 2022 жылы Украинаға басып кіру алдында берілген.

Оқи отырыңыз: 

• Армения Ресей газ бағасын көтерсе, ҰҚШҰ мен ЕАЭО-дан шығатынын мәлімдеді
• Ресей Үкіметі: жаңа Конституция Қазақстан мемлекетінің іргесін нығайта түседі
• Ресей мен Әзірбайжан айқасы: Екі елде қарсы тарап азаматтары ұсталды