Қызметке миллион: Абаев пен басқа министрлер қандай көлік пайдаланып жүр?

Orda.kz министрлер мен вице-министрлер қандай көліктерді пайдаланып жүргенін және оның республикалық бюджетке қалай әсер етіп жатқанын анықтады.

Жалға алу, көліктерге техникалық қызмет көрсету және кезекші жүргізушілерді қамтитын көлік қызметі үшін Мәдениет министрлігіне жылына 40 млн теңге бөлінеді. Министрлік жалға алған төрт көлікті төрт шенеунік пайдаланады.

Мәдениет және спорт министрі Дәурен Абаев 2015 жылы шыққан Mercedes-Benz S500 L 4M көлігін ұнатса керек. Министрдің көлігінің қызметі айына орта есеппен бір миллион теңге тұрады.

Айта кетсек, Mercedes-Benz S500 - жоғары санатты автокөліктер арасында ең танымалы. Қаржы министрі мен оның вице-министрі, Ауыл шаруашылығы бірінші вице-министрі, Ұлттық экономика министрі, Еңбек министрі, Ақпарат министрі де осы маркалы көлікті пайдаланып жүр. Бұл репрезентативті класс моделі, жаңа көліктің интернеттегі бағасы 60 млн теңге, ал пайдаланылған көлік 26 млн тұрады.

Мәдениет вице-министрі Нұрқиса Дәуешов Mercedes-Benz S350 L көлігін анда-санда Mercedes-Benz E200 4M-ге ауыстыратын тағы бір вице-министр Серік Жарасбаевпен бөлісіп жүр. Интернетте осы модельдердің пайдаланылған көліктері сәйкесінше 11 және 9 миллионға бағаланады.

Министрлік аппаратының басшысы Ернат Мұхамадиев «Мерседес» емес, «Киа» көлігін теуіп жүр. Kia Quoris-ті 11 млн теңгеге сатып алуға болады.

Ең қызығы, «Президент Іс Басқармасы Автокөлік бөлімі» республикалық мемлекеттік қазыналық кәсіпорны түрлі министрліктер мен комитеттердің басым көпшілігіне көлік қызметін жеткізуші болып табылады. Сонымен қатар, барлық қарастырылған конкурстар ашық болып табылады.