Қазақстан футбол құрамасының жаңа бапкері кім?

07 тамыз 2026 13:00 Ләззат Нұрсапақызы

Фото: sportilinet.kz

Журналист Айдын Кожахмет өзінің Telegram-арнасында хабарлағандай, Қазақстан ұлттық құрамасының жаңа бас бапкері болып 62 жастағы нидерланд маманы Джон ван’т Схип тағайындалды. Бұл туралы Спорт Шредингера басылымына сілтеме жасап Orda.kz хабарлайды.

6 тамыз күні Қазақстан футбол федерациясының баспасөз қызметі 7 тамызда жаңа бас бапкер ресми түрде таныстырылатынын мәлімдеген болатын. Кейін Айдын Кожахмет бұл қызметке дәл осы Джон ван’т Схип келетінін нақтылады.

Джон ван’т Схип 1963 жылы Канадада дүниеге келген. Балалық шағы сол елде өткеннен кейін отбасы Нидерландыға оралып, ол атақты «Аякс» клубы академиясында футболмен айналыса бастайды. Жартылай қорғаушы ретінде өнер көрсеткен футболшы 1981 жылы негізгі құрамға қосылып, 1992 жылға дейін клуб сапында ойнады. Осы уақыт ішінде ол «Аякс» үшін 273 матч өткізіп, 29 гол соқты.

Ван’т Схип Нидерланд чемпионы атағын 4 рет жеңіп алған. УЕФА кубогын иеленген.1988 жылы Нидерланд құрамасымен Еуропа чемпионы атанған. 1992 жылы Еуропа чемпионатының қола жүлдесін алған. 1994 жылғы АҚШ-та өткен әлем чемпионатына қатысқан. 1992 жылы ол италиялық «Дженоа» клубына ауысып, онда 107 матч өткізіп, 11 гол соққан. 1996 жылы ойыншы ретіндегі мансабын аяқтады.

Бапкерлік қызметін 1997 жылы «Аякс» жастар командасынан бастаған. Кейін клубтың бас бапкері Ко Адриансе құрамында ассистент болды. Ұлттық құрамада ойнаған кезде Марко ван Бастенмен жақын дос болып, 2004 жылы оның шақыруымен Нидерланд құрамасында ассистент бапкер қызметін атқарды.

Кейіннен «Аякс» клубында жұмыс істеді. Австралияның «Мельбурн Харт» (кейін «Мельбурн Сити») клубын басқарды. Мексиканың «Гвадалахара» клубында еңбек етті. 2016 жылы «Мельбурн Сити» командасымен Австралия кубогын жеңіп алып, бас бапкер ретіндегі алғашқы трофейін иеленді.

2026 жылы сәуірде Қазақстан футбол федерациясының бас хатшысы қызметіне австралиялық Скотт Манн тағайындалды. Дәл осы маман жаңа бапкер іздеу жұмысымен айналысқан еді.

22 маусымда Байсуфинов өз еркімен қызметінен кеткенін мәлімдеді. Осыдан кейін жаңа бапкер іздеу басталды. Айта кету керек, Скотт Манн мен ван’т Схип бұрыннан таныс және бірге Австралияда жұмыс істеген.

Енді Джон ван’т Схип Қазақстан құрамасындағы алғашқы ресми ойынын 2026 жылдың 26 қыркүйегінде өткізеді. Бұл күні ұлттық құрама Ұлттар лигасы (С дивизионы) аясында сырт алаңда Фарер аралдарына қарсы ойнайды.

Осы орайда Қазақстан құрамасының алдағы ойындарынығ (Ұлттар лигасы) кестесін бере кетейік:

26 қыркүйекте Фарер аралдары – Қазақстан
29 қыркүйекте Словакия – Қазақстан
2 қазанда Қазақстан – Молдова
6 қазанда Қазақстан – Фарер аралдары
14 қарашада Молдова – Қазақстан
16 қарашада Қазақстан – Словакия.

Жаңа бапкердің тәжірибесі мен халықаралық деңгейдегі жетістіктері Қазақстан құрамасы ойынына жаңа серпін береді деп күтілуде. Енді жанкүйерлер оның алғашқы матчтарын асыға күтіп жүр.

Еске салсақ, Қазақстан футбол федерациясының президенті Марат Омаров Талғат Байсуфинов қызметінен кеткеннен кейін ұлттық құрамаға жаңа бас бапкер іздеп жатқаны туралы айтқан болатын.

Оқи отырыңыз:

Жаңалықтар

барлық жаңалықтар