Мұратжан Мұсайбеков АМӨЗ-дің бас директоры болып тағайындалды

«Атырау мұнай өңдеу зауыты» ЖШС-нің (АМӨЗ) кезектен тыс жалпы қатысушылар жиналысы шешімімен Мұсайбеков Мұратжан Жүнісбекұлы бас директор (басқарма төрағасы) қызметіне тағайындалды. Бұл туралы «ҚазМұнайГаз» ҰК» АҚ баспасөз қызметіне сілтеме жасап Orda.kz хабарлады.

Айта кетейік, бұған дейінгі бас директор Қуаныш Ердәулетұлы Бишімовтің өкілеттігі тоқтатылды. Жаңа басшыны ұжымға «ҚазМұнайГаз» басқарма төрағасының орынбасары Әсет Мағауов таныстырды.

«ҚазМұнайГаз» басшылығы АМӨЗ алдына нақты міндеттер қойды. Атап айтқанда өндірістік тиімділікті арттыру, жеңіл мұнай өнімдерінің шығымын көбейту, өндіріс процесінің сенімділігі мен энергия тиімділігін күшейту, экологиялық жобаларды жалғастыру, қызметкерлер үшін қауіпсіз әрі қолайлы еңбек жағдайын жасау.

Сондай-ақ зауыттың тұрақты және үздіксіз жұмыс істеуінің маңыздылығы ерекше атап өтілді.

 Мұратжан Жүнісбекұлы Мұсайбеков 1974 жылы 7 қаңтарда дүниеге келген. Қазақ мемлекеттік басқару академиясын экономист мамандығы бойынша тәмамдаған. Одан кейін «Әділет» құқық академиясын  заңгер, Атырау мұнай және газ институтын органикалық заттардың химиялық технологиясы мамандығы бойынша бітірген. 
 
Еңбек жолын 1995–1997 жылдары «Райымбек» АҚ-да экономикалық мәселелер жөніндегі менеджер ретінде бастаған.

Кейін әр жылдары Алматы қаласының салық органдарында түрлі қызметтер атқарды. ICS Inspection and Control Services Kazakhstan компаниясында басшылық қызметтерде болды.
«Васильковский ГОК» АҚ-да атқарушы директор қызметін атқарды. «DIG1TEC» ЖШС-де жұмыс істеді. «АҚ Алтыналмас» АҚ директорлар кеңесінің мүшесі болды.

2009–2013 жылдары «ҚазМұнайГаз» ҰК» АҚ-да мұнай өңдеу және мұнай-химия жобалары бойынша басқарушы директор, департамент директоры қызметтерін атқарды.

2013–2017 жылдары «ҚазМұнайГаз-ПМ» АҚ-да маркетинг, даму, трансформация және бизнеске қолдау бағыттары бойынша басшылық қызметтерде болды.

2015–2018 жылдары Rominserv S.R.L. компаниясында директорлар кеңесінің төрағасы қызметін қоса атқарды.

2018 жылдан бастап АМӨЗ-де бас директордың кеңесшісі және басқарма мүшесі болды.
2019–2026 жылдары мұнай өңдеу жөніндегі басқарушы директор қызметін атқарған.

Оқи отырыңыз:

• Қазақстан футбол құрамасының жаңа бапкері кім?
• 30 миллион теңгеге денесіне жарнама салуды ұсынған Махмуд Хикматовқа іздеу жарияланды