Трамптың «Бейбітшілік кеңесі» Газаға арналған алғашқы келісімді әскери нысан салудан бастайды

АҚШ президенті Дональд Трамптың Газа секторын қалпына келтіру үшін құрған «Бейбітшілік кеңесінің» алғашқы құрылыс келісімі азаматтық инфрақұрылымды қалпына келтіру емес, әскери нысан салумен басталмақ, деп хабарлайды Orda.kz басылымы The Guardian-ға сілтеме жасап.

Әңгіме шамамен 150 әскери қызметкерге арналған уақытша база құру туралы болып отыр. Олар халықаралық тұрақтандыру күштерінің (ISF) құрамына кіреді. Нысан марокколық контингентті орналастыру үшін пайдаланылмақ.

Алдын ала келісімшартты Луизиана штатында орналасқан америкалық Arkel International компаниясы алуы мүмкін. Бұл компания бұған дейін Иракта және басқа елдерде АҚШ үкіметіне арналған жобаларды жүзеге асырған. Дегенмен, келісім әлі ресми түрде аяқталмаған.

Жоспарланған база шамамен 100×120 метр аумақты қамтиды және Израиль армиясының тікелей бақылауындағы Газа бөлігінде орналасады. Нысан Израиль шекарасынан шамамен бір жарым шақырым жерде салынып, ықтимал шабуыл жағдайында «жедел эвакуация бағытымен» қамтамасыз етіледі. The Guardian басылымының жазуынша, бұған дейін шамамен 5 мың әскери қызметкерге арналған ауқымды база салу жобасы да қарастырылған. Алғашқы кезеңде шатырлар, жатын орындар, санитарлық тораптар және басқа да уақытша нысандар орналастыру көзделген.

Халықаралық тұрақтандыру күштерін құру БҰҰ-ның Газа бойынша қарарында қарастырылған. Алайда олардың қызметінің нақты құқықтық негіздері мен орналастыру мерзімдері әлі анықталған жоқ. Марокко бұған дейін шағын контингент жіберуге дайын екенін мәлімдеген.

Бастапқыда Трамптың «Бейбітшілік кеңесі» «Жаңа Газа» атты ауқымды қалпына келтіру жоспарын ұсынған болатын. Жоба жағалауда жаңа қала салу мен инфрақұрылымды дамытуға бағытталған еді. Алайда уақыт өте келе бұл жоспар айтарлықтай қысқарып, қазір сектордың оңтүстігіндегі пилоттық бастамаларға шоғырланған.

Жобаны сынаушылардың пікірінше, бастапқыда Газа қалпына келтіру құралы ретінде ұсынылған «Бейбітшілік кеңесі» біртіндеп АҚШ-тың әскери қатысуын кеңейту тетігіне айналып барады.

Айта кетейік, Газа секторындағы әскери әрекеттерден кейін ғимараттардың шамамен 80 пайызы зақымданған немесе толық қираған. Оқ тоқтату туралы келісімнен кейін бірнеше ай өтсе де, халықтың едәуір бөлігі әлі күнге дейін уақытша лагерьлерде тұрып жатыр және негізгі тұрмыс жағдайларына қолжетімділігі шектеулі.

Оқи отырыңыз:

• Иран АҚШ пен Израиль кемелерінің Ормуз бұғазы арқылы өтуіне тыйым салмақшы
• «Байден ұқсап құлап қалмасын»: Невададағы Трамптың әзілі мемге айналды