Астанада сынақтан өткен әуетаксидің алғашқы жолаушысы — министр

07 тамыз 2026 12:14 Ләззат Нұрсапақызы

Астанада бортында жолаушысы бар ұшқышсыз жолаушылар әуетаксиінің демонстрациялық ұшуы көрсетілді. Бұл туралы Orda.kz ҚР Азаматтық авиация комитетіне сілтеме жасап хабарлайды.

Алғашқы жолаушы ретінде ұшаққа Көлік министрі Нұрлан Сауранбаев отырды. Демонстрациялық ұшу елордадағы арнайы рұқсат етілген аумақ үстінде жүзеге асырылды. Іс-шараға қатысушылар ұшқышсыз жолаушылар әуе жүйелерінің мүмкіндіктерін нақты жағдайда көре алды.

EH216-S — тік ұшып-қонатын (eVTOL) сериялық электрлі әуе аппараты. Ол екі жолаушыны тасымалдауға арналған, сағатына 130 шақырымға дейін жылдамдықпен ұша алады және 35 шақырымға дейінгі қашықтықты еңсереді.

Көлік министрлігінің мәліметінше, алғашқы кезеңде Қазақстанның табиғи, мәдени және тарихи нысандары үстінен ұзақтығы 5-тен 30 минутқа дейінгі демонстрациялық және туристік бағыттарды іске қосу жоспарланып отыр. Болашақта мұндай аппараттар қалалық көлік жүйесінің бір бөлігіне айналып, қолданыстағы көлік түрлерін толықтыруы мүмкін.

Жолаушылар тасымалынан бөлек, ұшқышсыз әуе жүйелерін жедел медициналық көмек көрсету, дәрі-дәрмек жеткізу, өрт сөндіру және логистика салаларында пайдалану көзделіп отыр.

Сондай-ақ жоба аясында халықаралық әріптестік негізінде Қазақстанда жолаушыларға арналған ұшқышсыз әуе аппараттарын өндіруді жергіліктендіру қарастырылған. Бұл жоғары технологиялық машина жасау саласын дамытуға, жаңа жұмыс орындарын ашуға және өнеркәсіптік кооперацияны кеңейтуге мүмкіндік береді.

Министрлікте атап өткендей, eVTOL әуе кемелерін пайдалану, вертипорттардың жұмысы және ұшқышсыз әуе қозғалысын басқару жүйесін реттейтін заңнамалық өзгерістер қабылданған. Бұл қалалық әуе мобильдігін елдің көлік жүйесіне қауіпсіз енгізуге жағдай жасайды.

Айта кетейік, бұған дейін 24 шілдеде Астанада әуетаксиінің алғашқы демонстрациялық ұшуы өткен болатын.

Оқи отырыңыз:

министр сынақ әуетакси

Жаңалықтар

барлық жаңалықтар