Блогер Қайсар Қамза Вьетнамнан Қазақстанға экстрадицияланды: Істің жай-жапсары

Қазақстанның Бас прокуратурасы блогер Қайсар Қамзаның Вьетнамнан Қазақстанға экстрадицияланғанын хабарлады, деп жазады Orda.kz ведомство баспасөз қызметіне сілтеме жасап.

Тергеу мәліметінше, ол 2025 жылдың қаңтарында әлеуметтік желілер мен мессенджерлердегі миллиондаған аудиториясын пайдаланып, сыйақы үшін заңсыз онлайн-казиноны жарнамалап, Қазақстан азаматтарын құмар ойындарға тартқан.

Бас прокуратураның мәліметіне сәйкес, осы жарнамалық қызметі үшін блогердің криптовалюталық әмиянына шамамен 200 мың АҚШ доллары түскен.

Құқық қорғау органдары бұл істің бірнеше жыл бойы жұмыс істеген ұйымдасқан қылмыстық топқа қатысты екенін айтады. Тергеу нұсқасы бойынша, 2021–2025 жылдары топ Қазақстанда бірнеше заңсыз онлайн-казино ұйымдастырып, төлем терминалдары арқылы 106 миллиард теңгеден астам заңсыз табыс тапқан.

Қазіргі таңда бұл іс бойынша 9 күдікті қамауда, ал қалғандары халықаралық іздеуге жарияланған болатын. Қайсар Қамза биыл маусым айында Интерпол арналарымен жүргізілген бірлескен операция кезінде Вьетнамның Камрань қаласында ұсталып, кейін Қазақстанға экстрадицияланды.

Қазір ол тергеу изоляторына қамалды. Егер кінәсі сотта дәлелденсе, оған 7 жылға дейін бас бостандығынан айыру және мүлкін тәркілеу жазасы тағайындалуы мүмкін.

Айта кетейік, Қайсар Қамза – Instagram желісінде 2,4 миллионға жуық оқырманы бар қазақстандық блогер. Бұған дейін де ол заңсыз онлайн-казиноны жарнамалағаны және заңсыз ұтыс ойындарын өткізгені үшін әкімшілік жауапкершілікке тартылып, айыппұл төлеген болатын. Ал халықаралық іздеуге жарияланғаннан кейін блогер әлеуметтік желіде өзіне тағылған айыптарды түсінбейтінін айтып, бұл жағдайға таңданысын білдірген еді.

Оқи отырыңыз:

• «Байден ұқсап құлап қалмасын»: Невададағы Трамптың әзілі мемге айналды
• Бишімбаевтың анасы бұрынғы келінінен 25 млн теңге өндіріп алмақ