Иран АҚШ пен Израиль кемелерінің Ормуз бұғазы арқылы өтуіне тыйым салмақшы

Иран парламенті комитеті америкалық, израильдік және басқа да «жау» елдердің кемелеріне Ормуз бұғазы арқылы өтуге тыйым салатын заң жобасын қарастырып жатыр. Бұл туралы ирандық Fars ақпарат агенттігі депутатқа сілтеме жасап мәлімдеді, деп хабарлайды Orda.kz.      

Ұсынылған заң жобасына сәйкес, енгізілген шектеулерді бұзған кемелерге жүктің жалпы құнының 20 пайызына дейін айыппұл салу қарастырылған.

Иран депутатының айтуынша, заң жобасы әлі де сарапшылардың қарауында. Парламент құжатты түпкілікті қабылдамас бұрын мамандарды өз ұсыныстарын беруге шақырған.

Бұл жаңалыққа мұнай нарығы да бірден әсер етті. Bloomberg агенттігінің жазуынша, трейдерлер Fars агенттігінің хабарламасын Парсы шығанағы елдерінен мұнай экспорты жақын уақытта шектеулі болып қала береді деген белгі ретінде қабылдаған.

Сонымен қатар, 6 тамыз, бейсенбі күні Йемендегі хуситтер Сауд Арабиясы әскерилерінің шоғырланған жерлеріне шабуыл жасағанын мәлімдеді. Ал бір күн бұрын олар Қызыл теңізде, Янбу мұнай экспорт терминалы маңында саудиялық танкерге шабуыл жасағанын хабарлаған.

Бұған дейін АҚШ президенті Дональд Трамп Иран үшін «жақсы келісімге қол қоюдың соңғы мүмкіндігі» екенін айтқан болатын. Ол сондай-ақ бұған дейін жоспарланған соққылардан бас тартып, Парсы шығанағындағы одақтастардың өтініші бойынша келіссөздерді жалғастыруға уәде берген.

Оқи отырыңыз:

• Иран мен Оман Ормуз бұғазы арқылы өтетін кемелерді бақылау туралы келісімге келді
• Мұнай бағасы күрт төмендеп, Brent маркасы 79 доллардан түсті
• 110 күнге созылған блокададан кейін Ормуз бұғазы арқылы алғашқы танкерлер өте бастады