Қытайда түрмеде жатқан қазақстандық Ақжарқын Тұрлыбайға арналған бейнебаян жарыққа шықты

Қытай түрмесінде жазасын өтеп жатқан қазақстандық Ақжарқын Тұрлыбайға арналған «Анаға хат» бейнебаяны жарыққа шықты.

Оны жас әнші Арайлым Маханбетжанова орындады.

«Анаға хат» әнінің алғашқы орындаушысы – марқұм Ажар Түзелбекқызы. Ажардың да бейнебаянында да есірткімен ұсталған қыздың оқиғасы баяндалған.

Әннің авторы Жәудір Артықбаева алғашқы клиптің тарихы туралы айтты.

«Ажар ең алғаш осы әнді клипімен көрсеткенде, неліктен соншалықты криминалға айналдырып жібергенін сұрап едім. Онда да жігіті тексерісте анашасын қыздың сөмкесіне салып үлгереді де, қыз түрмеде отырып анасын сағынады.

Бұл мен бірінен соң бірін босанып, төркініме, яғни анашыма үш-төрт жыл бара алмай, сағынған сәтте туылған ән еді. Студент те, алыста тұрмыстағы қыз да, жұмыспен шетте жүрген жан да ең бірінші анасын сағынады. Өмірдегі шынайылықтармен байланыстырса ғана жүректен шыққан ән жүрекке жетеді ғой»  дейді Жәудір Артықбаева.