Жазда самокатпен жүру тәртібі өзгеріп, қатаң талаптар енгізіледі

2026 жылғы 1 шілдеден бастап Қазақстанда электросамокаттарды пайдалану ережелері күшейтіледі, деп хабарлайды Orda.kz. 

Көктем мен жаз айларында, әсіресе Алматыда, самокат маусымы қыза түседі. Өткен жылы жаяу жүргіншілер тротуарлардың қауіпті әрі кей жерлерде жүріп өтуге қолайсыз болғанын айтса, самокат қолданушылар арнайы жолақтар жетіспейтінін айтады. 

Қыс мезгілінде ішкі істер министрлігі бұл мәселені жан-жақты қарастырып, ережелерді қатаңдатты. Жалға берілетін электросамокаттар енді азаматтық-құқықтық жауапкершілікті міндетті сақтандыруды және тіркеу нөмірін талап ететін көлік құралдары қатарына енгізілді.

Алматы қаласы полиция департаментінің мәліметінше, көктемге дейін қазіргі тәртіп сақталады. Яғни, 18 жастан бастап және жүргізуші куәлігін алған азамататтар самокатпен веложолақта, жолдың оң жиегінде немесе тротуарда сағатына 6 км жылдамдықпен жүруге болады.

Ал 1 шілдеден бастап жалға берілетін самокаттарға қойылған талаптар күшіне енеді. Енді әр самокат тіркеуден өтіп, міндетті сақтандыруы болуы тиіс. Компаниялар техникалық жағдайды қадағалап, пайдаланушылардың жеке куәлігі мен жүргізуші куәлігін тексеруге міндеттеледі.

18 жасқа толмағандарға, жүргізуші куәлігі жоқтарға және көлік басқару құқығынан айырылған азаматтарға самокат жалға берілмейді.

Сонымен қатар, тротуармен жүруге тыйым салынады. Самокатпен тек веложолақ немесе жолдың оң жиегімен жүруге болады. 

Полиция мәліметінше, 2025 жылы қалада самокат қатысқан 386 жол апаты тіркеліп, 400-ден астам адам зардап шеккен. Осыған байланысты бақылау күшейтіліп отыр.

Оқи отырыңыз:

• Қабырғаны бұзып кірген: Павлодардағы банкті тонады деген 4 күдікті Ресейде ұсталды
• Рим папасы уағыз дайындауда ЖИ қолданбауға шақырды
• Биыл БҚО-да су тасқыны бола ма? Мамандар жауап берді