Үкімет ең төменгі жалақы мөлшерін арттыру мәселесін қарастырады

Қазақстандықтардың табысын қалай арттыру жоспарланып отырғанын премьер-министрдің орынбасары – Ұлттық экономика министрі Серік Жұманғарин айтып берді, деп хабарлайды Orda.kz.

Үкімет ең төменгі жалақы мөлшерін (ЕТЖ) және азаматтық қызметшілердің еңбекақысын арттыру мәселесін қарастырады. Жұманғарин халықтың нақты табысын өсіруді Үкіметтің негізгі басым бағыттарының бірі деп атады.

Вице-премьердің айтуынша, билік жалақыны өсіру, сапалы жұмыс орындарын құру, азаматтардың қарыз жүктемесін азайту және кәсіпкерлікті қолдау бағытында кешенді шаралар қабылдамақ.

«Ең төменгі айлық жалақы мөлшерін, азаматтық қызметшілердің жалақысын арттыру, сондай-ақ жалдамалы қызметкерлердің табысын өзара міндеттемелерді орындау арқылы көтеру мәселесі қарастырылады», – деді Серік Жұманғарин үкімет отырысында. 

Оның сөзінше, бағдарламада халықтың жоғары несие жүктемесі мен тұтынушылық несиелендірудің өсуіне ерекше назар аударылған. Үкіметтің басты мақсаты – халықтың нақты табысының инфляциядан жоғары өсімін қамтамасыз ету, яғни кемінде 2–3 пайызға арттыру.

Жұманғарин бұл мақсатқа тұрақты экономикалық өсім мен инфляцияны одан әрі төмендету арқылы қол жеткізу жоспарланып отырғанын атап өтті.

Еске салайық, Үкімет 2026–2029 жылдарға арналған халық табысын арттыру жөніндегі кешенді жоспарды бекітті. Құжатта жалақыны көтеру, жұмыс орындарын құру, азық-түлік бағасын тұрақтандыру, салықтық жеңілдіктер беру, әлеуметтік қолдау көрсету және халықтың қарыз жүктемесін азайту шаралары қамтылған.

Сондай-ақ мемлекеттік қолдау алатын жұмыс берушілерге (субсидиялар, жеңілдетілген несиелер) қызметкерлерге өңір бойынша медиандық жалақыдан төмен емес еңбекақы төлеу міндеттеледі. Бұл талап орындалмаған жағдайда, олар мемлекеттік қолдаудан айырылуы мүмкін.

Оқи отырыңыз:

• 200-ден астам ер адамға «әйелдерге арналған ота» жасалған 
• Ұлттық домбыра күні: Астанада қандай іс-шаралар өтеді?
• Атырау облысындағы баласы ұрып-соғып, қамап ұстаған 90 жастағы қарияны немересі қолына алды