Ұлттық домбыра күні: Астанада қандай іс-шаралар өтеді?

Жыл сайын шілде айының алғашқы жексенбісінде Қазақстанда халқымыздың рухани мұрасы мен қазақ мәдениетінің басты нышандарының бірі саналатын домбыраға арналған Ұлттық домбыра күні аталып өтеді, деп хабарлайды Orda.kz.  

Астана қаласы әкімдігінің мәліметінше биыл мереке құрметіне Астанада мазмұнды мәдени бағдарлама әзірленген.

2 шілде күні сағат 15:00-де Байқоңыр ауданының Жазушылар аллеясында Ұлттық домбыра күніне арналған мерекелік концерттік бағдарлама өтеді. Іс-шара аясында «Алтын домбыра» ансамблі қазақтың аспаптық музыкасының таңдаулы шығармаларын орындайды.

3 шілде күні сағат 19:00-де Нұржол бағында ашық микрофон форматындағы Dombyra Party ұйымдастырылады. Онда кез келген қатысушы күй тартып, халық әндерін орындап, мерекелік көңіл күйдің бір бөлігіне айнала алады.

5 шілде күні сағат 17:00-де Бейбітшілік және келісім сарайында «Асыл мұра» атты концерт өтеді. Биыл бесінші рет ұйымдастырылып отырған бұл мәдени жоба қазақтың дәстүрлі музыкалық өнерін дәріптеуге және ұлттық мәдени мұраны сақтауға бағытталған.

Концерт барысында қазақтың дәстүрлі әншілік және күйшілік өнерінің Сарыарқа, Сырдария, Жетісу, Алтай–Тарбағатай және Батыс Қазақстан мектептері кеңінен таныстырылады. Көрермендер осы бес орындаушылық мектептің ерекшеліктерін айқындайтын ән тыңдап, жырлар мен күйлерді тамашалай алады.

Мәдени шараға танымал өнер қайраткерлері мен дәстүрлі өнер өкілдері қатысады. Сондай-ақ «Қорқыт» ансамблі, «Шалқыма» би ансамблі, «Dala Sound» квартеті және Еркеғали Рахмадиев атындағы Мемлекеттік академиялық филармонияның хоры өнер көрсетеді.

Осы күні елордадағы амфитеатрда тұрғындар мен қала қонақтарына жаңа форматтағы мультимедиялық қойылым ұсынылады. Сағат 12:00-ден 20:00-ге дейін амфитеатр аумағында балаларға арналған мәдени-ойын-сауық бағдарламасы ұйымдастырылып, шеберлік сабақтары, шығармашылық белсенділіктер мен интерактивті алаңдар жұмыс істейді.

Сағат 20:00-де амфитеатрда концерттік бағдарлама басталады.

Бұған дейін Қазақстан Республикасының президенті Қасым-Жомарт Тоқаев Парламент палаталарының бірлескен отырысында сөйлеген сөзінде домбыраның қасиетті ұлттық құндылық екенін атап өтіп, оның Қазақстанның әлемдік аренадағы бірегей брендіне айналуы керектігін айтқан болатын.

Оқи отырыңыз:

• Президент: Ұлтымыздың рухын көтеретін — домбыра!
• Енді ұшақ бортында домбыра тасымалдауға болады
• Домбыра, шаңырақ және қызғалдақ Қазақстанның жалпыұлттық символына айналды