Атырау облысындағы баласы ұрып-соғып, қамап ұстаған 90 жастағы қарияны немересі қолына алды

Атырау облысы Қызылқоға ауданының Сағыз ауылында тұратын 90 жастағы тыл ардагерінің туыстары қарияны ұлы үйінде қамап ұстап, ас-су бермегенін, аяқ-қолын байлап, қамап ұстағанын мәлімдеген болатын, деп хабарлайды Orda.kz.        

Қарт кісі қашып шығып, туыстарынан көмек сұраған.

Осы жағдай қоғамда резонанс тудырғаннан кейін, немересі қарияны өз қамқорлығына алды. Бұл туралы Аtyrau_today_news паблигі мәлім етті.

Немересі Нұрбақыт Ақниетқызының айтуынша, болған жағдай олардың отбасы үшін ауыр сынақ болған.

«Атам қазір біздің жанымызда, оған қажетінше күтім жасалып жатыр. Болған жағдай отбасымызға өте ауыр тиді. Баршаңызды ата-аналарыңызды тірі кезінде қадірлеп, оларға қамқорлық жасап, көңіл бөлуге шақырамын», – деді Нұрбақыт Ақниетқызы

Туыстарының айтуынша, қарияның баласы бұрын ішкі істер органдарында жұмыс істеген. Хабарланғандай, қарт адам қайшы тауып алып, өз бетінше босап шыққан. Түнде баласы ұйықтап қалғанда ол үйдің терезесінен шығып, ағасының үйіне жетіп, көмек сұраған.

Туыстары бұл істі жан-жақты тергеп, кінәлілерді жауапкершілікке тартуды талап етті. 

Полиция 19 маусымда дене жарақатын келтіру фактісі бойынша «Соққы» бабымен қылмыстық іс қозғалғанын хабарлады.

Қазіргі уақытта оқиғаның барлық мән-жайын жан-жақты, толық әрі объективті анықтауға бағытталған қажетті тергеу әрекеттері жүргізіліп жатыр.

Қарияның денсаулығы дәрігерлердің бақылауында. Ал полиция қызметкерлері оқиғаның барлық мән-жайын анықтап жатыр.

Оқи отырыңыз:

• Атырау облысында 90 жастағы қарияны баласы ұрып-соғып, қамап ұстаған
• Қарт әкесін сабап, оны видеоға түсіріп таратқан «батыр бала» бес тәулікке қамалды
• Түркістан облысында жол апатынан бір отбасының бес баласы қаза болды