Виктор Храпуновтың Қазақстандағы жер телімдері тәркіленеді

Экономикалық ресурстардың заңсыз шоғырлануымен күрес жөніндегі ведомствоаралық комиссия Алматының бұрынғы әкімі Виктор Храпуновтың жер телімдерін тәркіленетіні туралы хабарлады.

«Шығыс Қазақстандағы Храпуновтың 8 жер телімін тәркілеу бойынша атқарушылық іс қозғалды» делінген хабарламада.

Еске салсақ, 2018 жылдың қазан айында Алматы қаласының бұрынғы әкімі Виктор Храпунов пен оның жұбайы Лейла Храпунова сырттай сотталған болатын. Виктор Храпунов ұйымдасқан қылмыстық топ құру және оған жетекшілік ету, алаяқтық, пара алу, бөтеннің мүлкін иемдену бойынша, сондай-ақ қызметтік өкілеттіктерін асыра пайдаланғаны үшін кінәлі деп танылды. Виктор Храпуновтың мүлкі тәркіленіп, мемлекеттік қызмет атқару құқығынан айырылып, жазасын қатаң режимдегі колонияда өтеуге 17 жылға сырттай кесілген. Сонымен қатар Лейла Храпунова да кінәлі деп танылып, сырттай 15 жылға бас бостандығынан айырылған.

Қазіргі таңда Храпуновтар Қазақстанды тастап, шетел асып кеткен.