ҰҚК ШҚО қылмыстық істер жөніндегі сот алқасының төрағасы ұсталғанын растады

Қазақстан Республикасы Ұлттық қауіпсіздік комитеті Шығыс Қазақстан облыстық сотының қылмыстық істер жөніндегі сот алқасының төрағасы Әділ Бақиннің ұсталғаны туралы ақпаратты растады, деп хабарлайды Orda.kz.

Бұған дейін судьяның ұсталғаны жөніндегі мәліметтер әлеуметтік желілерде тараған болатын. Жарияланымдарда сот алқасы төрағасына қатысты процессуалдық іс-шараларды ҰҚК қызметкерлері жүргізіп жатқаны айтылған.

«Аталған факті бойынша сотқа дейінгі тергеп-тексеру жүргізіліп жатқанын хабарлаймыз. Қазақстан Республикасы Қылмыстық-процестік кодексінің 201-бабының 1-тармағына сәйкес өзге ақпарат жария етуге жатпайды» деп жазылған хабарламада. 

ҰҚК сотқа дейінгі тергеп-тексеру жүргізіліп жатқанын растады. Алайда қылмыстық істің мән-жайы, ұсталу себептері және күдіктінің процессуалдық мәртебесі әзірге жарияланған жоқ.

Іс бойынша өзге де мәліметтер қажетті тергеу әрекеттері аяқталғаннан кейін немесе құқық қорғау органдарының ресми мәлімдемелерінен соң белгілі болуы мүмкін.

Ал әлеуметтік желілерде жоғары лауазымды судьяның бір іс бойынша жазаны жеңілдету үшін 100 мың АҚШ доллары көлемінде пара алу кезінде ұсталғаны туралы ақпарат тарауда.

Оқи отырыңыз:

• Алматыда Қаршыға Ахмедияровтың 80 жылдығына арналған еске алу кеші өтті
• Маңғыстау — Семей пойызында өріп жүрген тарақандарға кім жауапты?
• Қытай Тайваньды өз меншігі деп санайды, ал Жапония мен Филиппин ол жерге экономикалық аймақ орнатқысы келеді