Маңғыстау — Семей пойызында өріп жүрген тарақандарға кім жауапты?

Жолаушылар №37 Маңғыстау — Семей пойызында өріп жүрген тарақандарды видеоға түсіріп, әлеуметтік желіде жариялады, деп хабарлайды Orda.kz.        

Шағым бойынша тексеру жүргізіліп, пойыздың санитарлық жағдайына жауапты барлық қызметкерлерге шара қолданылып, филиалға арнайы комиссия жіберілді.

Жарияланым астындағы пікірлерде адамдар вагондардың антисанитарлық жағдайына жаппай наразылық білдіріп, дезинсекцияның жеткіліксіз жүргізілетініне шағымданды. Кейбір жолаушылар мұндай мәселелердің басқа пойыздарда да, соның ішінде Маңғыстау — Алматы бағыты бойынша да кездесетінін жазды.

Шағымдарға жауап ретінде «Жолаушылар тасымалы» АҚ өкілдері пойыз белгіленген станцияға жеткеннен кейін құрамға жоспардан тыс дезинсекциялық өңдеу жүргізілетінін хабарлады.

«Вагонға жоспарлы өңдеу биылғы 30 мамырда белгіленген талаптарға сәйкес жүргізілді. Нормативке сәйкес жолаушылар вагондарына дезинсекция айына кемінде бір рет, ал дератизация тоқсанына кемінде бір рет жүргізіледі»,  деп нақтылады компания. 

Тексеру қорытындысы бойынша пойыз бастығы, өндірістік оқыту нұсқаушысы, «Батыс» филиалының Маңғыстау учаскесінің басшысы, сондай-ақ сервистік қызмет көрсету жөніндегі директор, оның орынбасары және «Батыс» филиалының бас инженері тәртіптік жауапкершілікке тартылды.

Сонымен қатар рейс алдында вагонды қабылдап, дайындауға жауапты болған комиссияның барлық мүшелері жазаланды.

Бұдан бөлек, жағдайдың мән-жайын анықтау үшін «Жолаушылар тасымалы» АҚ орталық аппаратынан «Батыс» филиалына арнайы комиссия жіберілді. Компания жолаушылардан келтірілген қолайсыздықтар үшін кешірім сұрап, вагондардың санитарлық жағдайын және қызмет көрсету сапасын жақсарту жұмыстарын реттейтінін мәлімдеді.

Оқи отырыңыз:

• Астанадағы LRT пойыздарының жолда «тұрып қалған» себебі белгілі болды
• Алматы облысында автобус пойызбен соқтығысты: Зардап шеккендердің жағдайы қандай?
• Полициядан қашқан: Астаналық мектеп оқушысы жүк пойызының төбесінен құлап кетті