Түрмеден қашып шыққан педофил тағы да бала зорлады

Өзбекстанның Ташкент облысында кәмелеттік жасқа толмаған балаға жыныстық сипаттағы зорлық-зомбылық жасағаны үшін сотталған ер адам колониядан қашып шығып, тағы да бала зорлады, деп хабарлайды Orda.kz.

Nova24.uz мәліметінше, Ташкент облысында сотталған адам колониядан қашып, ауыр қылмыс жасады деген ақпарат тарады. Ол бұған дейін кәмелетке толмағанға жыныстық зорлық жасағаны үшін жазасын өтеп түрмеде отырған. Қашқынды жергілікті тұрғындар ұстап, құқық қорғау органдарына тапсырған.

Облыстық ішкі істер басқармасы бұл оқиғаға түсініктеме берді. Қазіргі уақытта күдіктіге қатысты жаңа қылмыстық іс қозғалған. Қазір ол қамауда.

Белгілі болғандай, оқиға 16 қазанда Ахангаран ауданында болған. №50 колония-қонысында еңбек жұмыстарын атқарып жүрген 31 жастағы ер адам қашып шығып, зорлық жасаған. Тұтқынды жергілікті тұрғындар ұстаған.

Ол 2018 жылы он төрт жасқа толмаған адамға қатысты қылмыс жасағаны үшін 16 жылға сотталған болатын. 2024 жылдың тамызында сот шешімімен ол жазасының қалған бөлігін колония-қоныста өтеуге ауыстырылған.

Еске сала кетсек, Ақтөбе облысында 14 жастағы оқушы қыз босанды. Істе күдікті ретінде жәбірленушінің өгей атасы ұсталды. 

Сондай-ақ жақында Түркістан облысының Келес ауданында 15 жастағы қызға азғындық жасады деген күдікпен 71 жастағы ер адам ұсталды.