Француздардың контейнер кемесі соғыс басталғалы алғаш рет Ормуз бұғазынан сәтті өтті

Соғыс басталғаннан кейін Ормуз бұғазынан шыққан алғашқы еуропалық кеме француз контейнер кемесі болды, деп хабарлайды Orda.kz Bloomberg сайтына  сілтеме жасап. 

CMA CGM Kribi контейнер кемесі Ормуз бұғазынан өтті. Кеше, 2 сәуірде кеме Дубайдан шығып, Иранға бағыт алды. Кемелерді қадағалау деректері бойынша кеменің француздардың меншігіне жататыны көрсетілген. Кеме Иран жағалауына жақын жүріп, Кешм және Ларак аралдары арасындағы арнадан өткен және өз бағытын ашық көрсеткен. Бүгін таңертең CMA CGM Kribi Маскат жағалауында екені белгілі болды. Жағдайдан хабардар екі адам да кеменің бұғаздан өткенін растады.

АҚШ пен Израильдің Иранға жасаған шабуылынан кейін бір айдан астам уақыт ішінде Ормуз бұғазындағы қозғалыс іс жүзінде тоқтап қалған. Қазір тек аздаған кемелер ғана ол жерден өте алады. Олардың басым бөлігі достық елдерге тиесілі кемелер.

Мысалы, Пәкістан өз туы астындағы 20 кеменің өтуіне келісім алған. 

АҚШ пен Израильдің Иранға қарсы әскери операциясы басталғаннан кейін Тегеран Ормуз бұғазында сауданы тоқтататынын жариялады. Бұл бұғаз арқылы әлемдік мұнайдың 20%-ға жуығы және сұйытылған табиғи газдың 30%-дан астамы өтеді. Кейбір кемелер бұғаздан өтуге әрекет жасағанда ирандық әскерилер тарапынан шабуылға ұшыраған.

Оқи отырыңыз:

• Ормуз бұғазын ашуды талқылау үшін 30 ел бірікті
• Ормуз бұғазындағы қиындық: Жапония Қазақстан мен Әзербайжаннан мұнай импорттайды
• Өскеменнің бұрынғы әкімі Жақсылық Омар 6 жылға сотталды