Павлодарда жаңа туған сәбиін 800 мың теңгеге сатпақ болған ана ұсталды

Павлодар облысының жедел қызметкерлері жаңа туған баланы сату әрекетінің жолын кесіп, нәрестені 800 мың теңгеге сатпақ болған ананы құрықтады, деп хабарлайды Orda.kz.      

Түркістан облысының 23 жастағы тұрғыны жүктіліктің соңғы кезеңінде-ақ әлеуметтік желілер арқылы әдейі сатып алушыларды іздеген. Жүргізілген жедел іс-шаралар нәтижесінде полиция қызметкерлері оны анықтап, қылмыстық ниетін құжаттап, бақылау арқылы ұстау шарасын өткізді.

Босанғаннан кейін әйел үш күндік нәрестені ақшаға сатпақ болған. Сол сәтте ол қылмыс үстінде ұсталды.

«Полицияның дер кезінде әрі кәсіби әрекетінің арқасында балаға тиетін ауыр әрі қайтымсыз салдарлардың алдын алу мүмкін болды» деп хабарлады жергілікті ПД. 

Аталған дерек бойынша қылмыстық іс қозғалды. Күдікті уақытша ұстау изоляторына қамалды. Жаңа туған қыз бала дәрігерлердің бақылауында, оның өмірі мен денсаулығына еш қауіп төніп тұрған жоқ.

Қазіргі уақытта тергеу арқылы оқиғаның барлық мән-жайы анықталып жатыр. Соңғы құқықтық баға заң талаптарына сәйкес беріледі.

Полиция адам саудасының кез келген түрі, әсіресе балаларға қатысты әрекеттер қатаң түрде тоқтатылатынын атап өтті.

Оқи отырыңыз:

• Қытайға сату үшін бала туған
• БҚО тұрғыны балаларын сатты деген күдікке ілінді
• Қазақстанда әйел жаңа туған нәрестесін сатпақ болған