Туды құтқару үшін ер адам өртеніп жатқан ғимараттың төбесіне шықты

Түркістан облысында мемлекеттік мекеме қызметкері өртеніп жатқан ғимараттың төбесіндегі туды құтқарып қалды.

Бұл туралы Оtyrar.kz хабарлайды.

Жұмыспен қамту орталығының өртеніп жатқан ғимаратынан мемлекеттік туды құтқару сәті түсірілген видео әлеуметтік желі қолданушыларын тәнті етті.

Ер адам өртеніп жатқан ғимараттың төбесіне шықты. Өз басына қауіп төндірген ол мемлекеттік рәмізді ту тұғырынан асығыс алып, жерге лақтырып, оқиға орнынан кетіп қалады.

Түркістан облысының Төтенше жағдайлар департаменті хабарлағандай, видеодағы кейіпкер жұмыспен қамту орталығының қызметкері. Оқиға 17 шілде күні Сайрам ауданы Ақсукент ауылында болған. Өрттен ешкім зардап шеккен жоқ. Өртті сөндіруге 29 өрт сөндіруші мен сегіз полиция қызметкері шықты.

«Жұмыспен қамту орталық ғимаратының бірінші қабаты мен «Светофор» дүкенінің шатырынан өрт шықты, өрт 413 шаршы метр аумақты қамтыды. Сағат 14.31-де өрт оқшауланып, 16.15-те жойылды. Құрбандар мен зардап шеккендер жоқ» делінген хабарламада.