Тоқаевқа бюджет қаражатын жымқыру жолдары туралы баяндалды

Президент Қасым-Жомарт Тоқаев Қаржылық мониторинг агенттігінің төрағасы Жанат Элимановты қабылдады, деп хабарлайды Orda.kz.       

Кездесу барысында мемлекет басшысы агенттіктің 2026 жылдың бірінші жартыжылдығындағы негізгі жұмысының қорытындылары мен алдағы кезеңге арналған міндеттер туралы есепті тыңдады.

Сонымен қатар, есірткі бизнесі мен алаяқтықтан түскен кірістерді жылыстатуға пайдаланылған 12 көлеңкелі криптоалмасу пункті жабылып, 36 дропперлік топ анықталған. Бұл топтардың есепшоты арқылы 113 млрд теңге көлемінде қаржылық операция жүргізілген.

Ақорда мәліметінше, ТМД елдері арасында алғаш рет ұялы байланыс операторлары жұмысына ұқсас арнайы құрылғыларды пайдаланып, фишингтік СМС-хабарламалар арқылы жеке деректерді заңсыз иемденген тұлғалардың әрекеті әшкереленген.

Агенттік төрағасы бюджет шығындарын бақылау шаралары туралы да баяндады. Нәтижесінде 52 инфрақұрылымдық жоба бойынша 279 млрд теңге көлеміндегі негізсіз шығындардың алдын алу мүмкін болған. Сонымен бірге ғылыми әзірлемелерді коммерцияландыру барысында 10 млрд теңге көлемінде мемлекеттік қаражатты жымқыру тәуекелдері анықталған. Бұдан өзге, 140 мың азаматты жалған тіркеу арқылы жеке клиникалардың ӘМСҚ есебінен заңсыз қаржы алу жолы әшкереленген.

Алдын алу шаралары аясында заңсыз ойын бизнесінің белгілері бар 9 мың сайт пен аккаунтқа қолжетімділік бұғатталған. Сондай-ақ 2,3 мың алаяқтық ресурс пен 35 мыңнан астам аудиториясы бар 25 топтық чаттың қызметі тоқтатылған. Қаржылық сауаттылықты арттыру шараларымен 245 мыңнан астам азамат қамтылған.

Қаржылық мониторинг саласындағы заңнаманы жетілдіру нәтижесінде Қазақстан FATF ұйымының төрт негізгі ұсынымы бойынша рейтингін жақсартқан.

Кездесу қорытындысы бойынша мемлекет басшысы агенттік қызметінің негізгі бағыттары бойынша нақты тапсырмалар берді.

Бұған дейін Түркістан облысында агробизнесті қолдау бағдарламасынан 3 млрд теңгеден астам қаржыны жымқырды деп айыпталған ұйымдасқан қылмыстық топтың 27 мүшесіне үкім шығарылған болатын. Түркістанда ҰҚТ ауадан ақша жасап, жоқ фермаға мемлекеттен үш млрд несие алған тор туралы жазғанбыз.

Олар жалған тұлғалардың атына шаруа қожалықтары мен жеке кәсіпкерлер тіркеліп, іс жүзінде ауыл шаруашылығымен айналыспаған, тек қағаз жүзінде ғана болған.

Оқи отырыңыз:

• Түркістанда ҰҚТ ауадан ақша жасап, жоқ фермаға мемлекеттен үш млрд несие алған
• Бюджет тапшылығы: Қазақстан халықаралық банктерден жарты триллион теңгеге жуық қарыз алады
• Әкімдіктер бюджеттен бөлінген 40 миллиард теңге қаражатты игере алмады