Бюджет тапшылығы: Қазақстан халықаралық банктерден жарты триллион теңгеге жуық қарыз алады

Қазақстан бюджет тапшылығын жабу үшін екі халықаралық қаржы институтынан шамамен жарты триллион теңге қарыз алмақ. Бұл туралы Сенат отырысында Қаржы және бюджет комитетінің мүшесі Бекболат Орынбеков мәлімдеді, деп хабарлайды Orda.kz.

Оның айтуынша, Қазақстан Азия инфрақұрылымдық инвестициялар банкінен 62,3 млрд жапон иенін және Халықаралық қайта құру және даму банкінен тағы 92,3 млрд жапон иенін тартпақ.

«Қарыз қаражаты биылға арналған республикалық бюджет тапшылығын қаржыландыруға мүмкіндік береді. Осылайша 2026 жылға арналған республикалық бюджет аясында мемлекет қабылдаған барлық міндеттемелердің орындалуы қамтамасыз етіледі», — деді Орынбеков. 

Ол сондай-ақ екі несиенің де 11 жыл мерзімге берілетінін, оның ішінде бес жыл жеңілдікті кезең қарастырылғанын атап өтті.

«Тартылатын қарызға қызмет көрсету және оны өтеу Қаржы министрлігі тарапынан келесі қаржы жылына арналған республикалық бюджетте көзделген қаражат есебінен, қарыз келісімдерінде белгіленген қаржылық шарттарға сәйкес жүзеге асырылады», — деді сенатор. 

Сенат «Қазақстан мен Азия инфрақұрылымдық инвестициялар банкі арасындағы инклюзивті және орнықты экономикалық өсуді қаржыландыруға арналған қарыз туралы келісімді ратификациялау туралы» заңды мақұлдады.

Бұған дейін Қазақстанның үш шетелдік банктен бір миллиард доллардан астам қарыз алатыны хабарланған болатын.

Оқи отырыңыз:

• Несие алу қиындайды:Ұлттық банк қосымша шектеулер енгізеді
• Еліміздегі халыққа берілген несиелер көлемі 4,4%-ға қысқарды
• Соққыдан аударылды: Алма-Арасан шатқалында жол апатынан бірнеше адам зардап шекті