Тоқаев Моңғолия президентін «Алтын Қыран» орденімен марапаттады

21 сәуір 2026 17:21 Ләззат Сұңқар

Фото: Ақорда

Қасым-Жомарт Тоқаев Моңғолия Президенті Ухнаагийн Хурэлсухты «Алтын Қыран» орденімен марапаттады. Мемлекет басшысы тарихи сапар аясында марапаттау рәсімін өткізу қазақ тарапы үшін зор мәртебе екенін атап өтті, деп хабарлайды Orda.kz.

Тоқаев Ухнаагийн Хурэлсухты халқын алға бастап келе жатқан парасатты, білікті, ірі саясаткер деп білетінін атап өтті. Оның Моңғолияны көркейту жолындағы қажырлы еңбегіңізді жоғары бағалап, салиқалы саясаттың арқасында елінің өсіп-өркендеп келе жатқанын айтты.

«Өзіңіздің бастамаңызбен түрлі салада тың жобалар жүзеге асырылып жатыр. Моңғолияның экономикасы дамып, халқыңыздың әл-ауқаты жақсарды. Сонымен қатар еліңіздің аймақтағы және әлемдегі беделі арта түсті. Сіздің басшылығыңызбен моңғол жұрты алдағы уақытта да биік белестерді бағындыра беретініне кәміл сенеміз» , – деді Қасым-Жомарт Тоқаев.

Президент екі ел арасында шынайы достық пен өзара құрметке негізделген қарым-қатынас орнағанына тоқталды. Тоқаев бірлескен күш-жігердің арқасында қазақ-моңғол байланысы стратегиялық серіктестік деңгейіне көтерілгенін тап өтті.

«Бүгін қол жеткізілген маңызды келісімдер достығымызды одан әрі бекемдей түсетіні сөзсіз. Қазіргі алмағайып, дүбірлі кезеңде осы ықпалдастығымызды күшейтудің мәні айрықша. Бұған барлығымыз да мүдделіміз. Сіз қазақ-моңғол қарым-қатынасын нығайтуға зор еңбек сіңірдіңіз. Осыған орай, мен Өзіңізді Қазақстан Республикасының ең жоғары мемлекеттік наградасы – «Алтын Қыран» орденімен марапаттау туралы шешім қабылдадым. Бұл награда – барша қазақ халқының Сізге және бауырлас моңғол жұртына деген ерекше құрметінің белгісі. Қазақстан мен Моңғолияның достығы мәңгі болсын» ,– деді мемлекет басшысы.

Ухнаагийн Хурэлсух Қасым-Жомарт Тоқаевқа жоғары марапат тапсырғаны үшін алғыс айтып, Қазақстанмен достық қарым-қатынасты одан әрі дамыту жолында барынша күш-жігер жұмсауға дайын екенін жеткізді.

Оқи отырыңыз:

Жаңалықтар

барлық жаңалықтар