TikTok тікелей эфирінде аузына келгенін айтқан тағы бір «блогер» қамалды

Абай облысында 26 жастағы қыз TikTok-тағы тікелей эфирден кейін қамауға алынды. Эфир барысында ол бейәдеп сөздер айтып, әдепсіз әрекет жасап, есірткі қолданғанын мәлімдеген, деп хабарлайды Orda.kz.       

Ішкі істер министрлігінің хабарлауынша, құқық бұзушылық әлеуметтік желілерді мониторингтеу барысында анықталған. Тікелей эфир кезінде қыз балағат сөздер қолданып,  арандатушылық сипаттағы әрекеттер жасап, есірткі қолданғанын айтқан.

Полиция қызметкерлері құқық бұзушының жеке басын жедел анықтады. Ол Түркістан облысының 26 жастағы тумасы болып шықты. Ол қазіргі уақытта Семей қаласында уақытша тұрып жатыр екен. Медициналық куәландыру нәтижесі бойынша, ұсталған сәтте қыз ішімдікке мас болған. Сот оны ұсақ бұзақылық жасағаны үшін кінәлі деп танып, 10 тәулік әкімшілік қамауға алу жазасын тағайындады.

«Интернеттегі әрбір осындай тікелей эфир, заң мен қоғамдық тәртіпті бұзудың әрбір фактісі тиісті құқықтық бағасын алады, ал құқық бұзушыларға заңнамаға сәйкес шара қолданылады», деп мәлімдеді ведомство. 

Еске салсақ, күні кеше ғана желі мәдениетін бұзған тоғыз треш-стример  жауапкершілікке тартылды. Полиция мәліметінше, стримерлер лайк, қаралым және донат жинау мақсатында бейәдеп сөздер айтып, әдепсіз әрекеттер көрсетіп, қауіпті пранктар ұйымдастырып, адамдарды қорлаған.

Полиция әрбір осындай жағдайға құқықтық баға берілетінін еске салды.

Жақында Ішкі істер министрлігі «Жол қозғалысы туралы» заңға енгізілген соңғы өзгерістерге қатысты түсініктеме беріп, блогерлер мен әлеуметтік желі қолданушыларын тек тексерілген ақпаратты ғана таратуға шақырды.      

Оқи отырыңыз:

• ІІМ блогерлер мен ақпараттық ресурс иелеріне иелеріне ескерту жасады
• Сайлау кезіндегі дипфейк: Саяси партия өкілдерінің бейнелері заңсыз пайдаланылып жатыр
• Жуалы ауданында шопандардан заңсыз қару тәркіленді