Сайлау кезіндегі дипфейк: Саяси партия өкілдерінің бейнелері заңсыз пайдаланылып жатыр

Дезинформациямен күрес орталығы сайлау науқаны кезеңінде әлеуметтік желілер мен мессенджерлерде жасанды интеллект көмегімен жасалған бейнероликтердің таралуына байланысты қазақстандықтарға ескерту жасады, деп хабарлайды Orda.kz.       

Орталық мәліметінше, мұндай видеоларда саяси партия өкілдерінің бейнелері заңсыз пайдаланылып жатыр.

«Мұндай материалдар – ақпараттық ықпал ету мен қоғамдық пікірді манипуляциялау құралдарының бірі. Оларды тарату сайлау процесіне қатысушылардың беделін түсіруге, қоғам назарын партиялардың сайлауалды бағдарламалары мен үгіт-насихат жұмыстарынан басқа жаққа бұруға, сондай-ақ дауыс беру қарсаңында маңызды қоғамдық ақпаратты бұрмалап қабылдауға бағытталуы мүмкін»,  деп атап өтті орталық.

Сонымен қатар орталық ресми ақпаратқа ғана сенуге шақырды. Атап айтқанда, саяси партиялар атынан жасалған мәлімдемелер, үндеулер, бейнематериалдар мен басқа да жарияланымдар тек олардың ресми ақпараттық ресурстарында орналастырылған немесе ақпараттың дұрыстығына жауап беретін тіркелген бұқаралық ақпарат құралдары жариялаған жағдайда ғана шынайы деп есептелуі тиіс екені айтылды.

Еске салсақ, бұған дейін Қазақстандықтарға жалған ақпарат, жала жабу және сайлауға қатысты сауалнамалар үшін жауапкершілік бар екені ескертілді. Бұл туралы Қазақстан Республикасының Бас прокуратурасы арнайы үндеу жасады.

Қазақстандықтар интернеттегі жарияланымдардың қылмыстық және әкімшілік істерге себеп болатынына күн өткен сайын көздері жетіп жүр. Қазақстанда әлеуметтік желілерге «жай ғана ойын-сауық» ретінде қарау әлдеқашан тоқтаған. Сайлау кезіндегі ескертуге орай Orda.kz  әлеуметтік желідегі қандай пікірлер үшін нақты жаза тағайындалуы мүмкін екенін саралаған материалды назарларыңызға қайта ұсынамыз.

Оқи отырыңыз:

• Сайлауда жалған ақпарат таратқандар жазаланады
• Ұлттық, діни және әлеуметтік алауыздық. Бас прокуратура үндеу жасады
• Әлеуметтік желідегі қандай пікірлер үшін нақты жаза тағайындалуы мүмкін?