TikTok-тағы алаяқ «ҰҚК майорына» Петропавлда үкім шықты

01 тамыз 2026 16:31 Ләззат Нұрсапақызы

Фото: gov.kz

TikTok-та өзін ҚҰК «майоры» ретінде таныстырған адамға Петропавлда сот үкім шығарды. Сотталған 31 жастағы Дамир Амангелдиевтің өзіне сенсек, ол еліміздегі түрлі күштік құрылымдардың бәрінде дерлік жұмыс істеп үлгерген, деп хабарлайды Orda.kz.

Біреулерге өзін ҚАЖД қызметкері ретінде таныстырса, енді біріне есірткі қылмысына қарсы күрес қызметкері, ал басқаларына ҰҚК майоры екенін айтқан.

Алайда ол өмірде осы «мансап жетістіктеріне» жеткізген органдардың бірінің де есігін ашып көрмеген. Есесіне, ол ақшаға өзгенің мәселесін шешіп бере алатынын өте сенімді айтып, жұртты сендірген.

Петропавл тұрғынына ол жүргізуші куәлігін еш қиындықсыз алып беруге уәде беріп, 80 мың теңгесін қағып алған. Ал жалпы «көмек ақысы» әр адамға әртүрлі болып, 150 мың теңгеге дейін жеткен.

Алаяқтың айласына TikTok-та танысқан жүрегі жұмсақ әйел де алданып қалған. Амангелдиев оған науқас анасы, баласы және қызметтегі қиындықтары туралы әсерлі әңгімелеп берген. Нәтижесінде әйел оған ақша аударып қана қоймай, алтын әшекейлерін де берген. «Құқық қорғау қызметкері» оларды тез арада ломбардқа өткізген. Жалпы келтірілген шығын шамамен 700 мың теңге болған.

Ең қызығы, Амангелдиев осы әрекеттердің бәрін өзі пробациялық бақылауда жүргеніне қарамастан, қорықпай жасаған.

Сотта ол кінәсін толық мойындап, өкініш білдіріп, өзіне қатаң жаза қолданбауды сұраған. Алайда қауіпті қайталанған қылмысқа байланысты жалған полицей қайтадан бас бостандығынан айырылды.

Петропавл қалалық соты Дамир Амангелдиевті бірнеше рет жасалған алаяқтығы үшін кінәлі деп танып, оған қауіпсіздігі ең жоғары мекемеде 4 жыл 8 айға бас бостандығынан айыру жазасын тағайындады.

Сонымен қатар, ол жәбірленушілердің біріне шамамен 620 мың теңге материалдық шығынды өтеуге міндеттелді.

Үкім әзірге заңды күшіне енген жоқ.

Оқи отырыңыз:

tiktok үкім ұқк майоры

Жаңалықтар

барлық жаңалықтар