Қазақстан Конституциясы мен домбыра Памир шыңына көтерілді

Қазақстандық альпинист, музыкант әрі әртіс Әлібек Қайырбек Памирдегі Раздельная шыңына Қазақстан Конституциясы мен домбыраны алып шықты, деп хабарлайды Orda.kz.      

 Бұл шара «Әлем шыңдарындағы домбыра» халықаралық мәдени-патриоттық жобасы аясында жүзеге асқанын Қазақстанның Конституциялық соты мәлімдеді.

Қазақстанның Конституциялық сотының хабарлауынша, осындай халықаралық экспедициялар барысында ол әртүрлі елдердің альпинистерін Қазақстанның тарихымен, мәдениетімен, мемлекеттік рәміздерімен және елдің Ата заңымен таныстырып келеді екен. 

«Раздельная шыңының басында Әлібек Қайырбек домбырада қазақ күйлерін орындап, сондай-ақ Қазақстан Республикасының қолданыстағы Конституциясын алып шықты. Жоба жүзеге асырылған жылдар ішінде Әлібек Қайырбек Еуропа, Африка, Гималай, Тянь-Шань және Памирдің ең биік шыңдарына шығып, домбырамен қазақ күйлерін орындап жүр»,  деп мәлімдеді сот. 

2025 жылы Қазақстан Республикасы Конституциясының 30 жылдығына орай Әлібек Қайырбек тарихта алғаш рет қазақ елінің Ата заңын Гималайдағы Айленд-Пик шыңына көтерген болатын. Ал 2026 жылы ол бұл патриоттық дәстүрді жалғастырды.

Қазақстанның жаңа Конституциясы 1 шілдеде күшіне енді. Мұндай шешім 2026 жылғы 15 наурызда өткен  жалпыұлттық референдумда қабылданды. Қазақстан Республикасы Орталық референдум комиссиясы мәліметінше, дауыс беруге қатысу деңгейі 73% болды. Тізімге енгізілген 12,5 миллион азаматтың шамамен 9 миллионы учаскелерге келген.

Екі күннен кейін, 17 наурызда комиссия қорытынды нәтижелерді жариялап, қазақстандықтардың 87%-ы «қолдаймын» деп дауыс бергенін мәлімдеді.

Оқи отырыңыз:

• Елімізде жаңа Конституция күшіне енді: Жаңа дәуірдің бастауы
• Қазақстанның жаңа Конституциясы референдумда ресми түрде мақұлданды
• Ресей Үкіметі: жаңа Конституция Қазақстан мемлекетінің іргесін нығайта түседі