Түркияға жұмыс істеуге кеткен қазақстандық Грекияда 125 жылға сотталды

Ақтөбенің 24 жастағы тұрғыны Түркияға табыс табу үшін барып, Грекия түрмесінен бір ақ шыққан. Сот оны 125 жылға бас бостандығынан айырып, ірі көлемде айыппұл салған, деп хабарлайды Orda.kz  aktobetimes.kz басылымына сілтеп.

Анасының айтуынша, айыппұл шамамен 1 миллиард теңге болған. Сотталған жігіттің анасы Нұрхан Қадырованың сөзінше, ұлы Instagram желісінен Түркияда жұмыс туралы хабарландыру көрген. Жұмыс беруші оған ұшақ билетін төлеп, моторлы қайықпен туристерді алып жүру жұмысын ұсынған.

Алайда кейін, әйелдің айтуынша, жас жігітті Грекияға заңсыз мигранттарды тасымалдауға тартқан. Сол жерде ол ұсталып, қылмыстық іс қозғалған.

Анасының айтуынша, оның ұлы тасымалды ұйымдастырушы болмаған, тек үйлестірушінің тапсырмаларын ғана орындаған.

«Оның аңғалдығын пайдаланған», – дейді Нұрхан Қадырова. 

Сондай-ақ ол сот барысында оған аудармашы берілмегенін айтыпты. Анасының сөзінше, жігіт құжаттардың мазмұнын түсінбей, қол қоя салған.

Түрме жазасынан бөлек, сот оған ірі көлемде айыппұл да тағайындаған. Қазір отбасы онымен сирек байланысқа шығып, азық-түлік пен ең қажетті заттарға ақша жіберіп отыр екен.

Алдағы уақытта оны тағы бір сот отырысы күтіп тұр екен. Оның анасы Қазақстанның Сыртқы істер министрлігіне жүгініп, ұлына көмек көрсетуді және оның құқықтарын қорғауды сұраған.

Оқи отырыңыз:

• «Қарасора – 2026»: Есірткі тасушы «жұмысын бастаған» әйелден 113 түйіншек табылды
• Қостанай облысында жол апатынан екі адам қаза тауып, төрт жолаушы түрлі жарақатпен ауруханаға түсті