Тәуелсіздік сарайында Кения президентін ресми қарсы алу рәсімі өтті

Президент Қасым-Жомарт Тоқаевтың шақыруымен Кения Республикасының президенті Уильям Руто Қазақстанға мемлекеттік сапармен келді. Тәуелсіздік сарайында елімізге мемлекеттік сапармен келген Кения президентін ресми қарсы алу рәсімі өтті, деп хабарлайды Orda.kz.       

Іс-шара барысында Қасым-Жомарт Тоқаев пен Уильям Руто бір біріне ресми делегация мүшелерін таныстырды.  Құрмет қарауылы ротасының бастығы рапорт берген соң екі елдің әнұрандары шырқалды.

Ертең жоғары деңгейдегі келіссөздер барысында екі елдің сауда-экономикалық және мәдени-гуманитарлық ынтымақтастығын дамыту перспективасы талқыланады. Сонымен қатар бірқатар құжатқа қол қойылады деп жоспарланып отыр.

Тоқаев пен Кения президенті Уильям Руто шағын құрамда келіссөз жүргізді

Қасым-Жомарт Тоқаев кениялық көшбасшыға сапары және кәсіпкерлерден құралған өкілді делегацияның қатысқаны үшін алғыс айтып, ынтымақтастықты дамытуға қызығушылық бар екенін атап өтті. Ол Кенияның Қазақстанның Африкадағы маңызды серіктесі екенін айтып, Найробиде елшілік ашу туралы шешім қабылданғанын мәлімдеді.

Өз кезегінде Уильям Руто Қазақстанды болашағы зор логистикалық хаб әрі Еуразия нарығына шығатын маңызды бағыт ретінде қарастыратынын айтты. Сондай-ақ ол екі ел арасындағы тауар айналымының өсіп келе жатқанын атап өтіп, ауыл шаруашылығы өнімдерін экспорттауды қоса алғанда, экономикалық ынтымақтастықты кеңейтуге және жаңа келісімдерге қол қоюға үміт білдірді.

Біз таңертең әуежайда Уильям Рутону Қазақстан Республикасының сыртқы істер министрі Ермек Көшербаевтың қарсы алғанын жазған болатынбыз. Руто әлеуметтік желідегі парақшасында Қазақстанда екі күн болатынын жазды.

«Кения мен Қазақстан он жылдан астам уақыт бойы мақсатты байланыстар мен кездесулер арқылы достық қарым-қатынасты нығайтып келеді. Енді осы жылы қатынастарды жаңа деңгейге көтеретін уақыт жетті. Сауда байланыстарымыз шай, гүл, тыңайтқыштар мен логистика салаларында дамып келеді. Сондай-ақ Найроби мен Астана, сондай-ақ Орталық Азияның басқа елдері арасындағы тікелей қатынастардың артуы да бұл үдеріске оң әсерін тигізуде» деп жазды ол. 

Кения басшысы алдағы уақытта қаржы, ақпараттық-коммуникациялық технологиялар, туризм, энергетика және алмасу бағдарламалары салаларында жаңа мүмкіндіктерді зерттеу арқылы ынтымақтастықты кеңейтуді жоспарлап отырғанын атап өтті.

Оқи отырыңыз:

• Қазақстанға Кения президенті келді
• Димаш Құдайберген БҰҰ елшісі ретінде Бангладештегі босқындарға қолдау білдірді
• Си Цзиньпин мен Путиннің Бейжіңдегі кездесуі басталды