Қазақстанға Кения президенті келді

Қазақстан президенті Қасым-Жомарт Тоқаевтың шақыруымен Кения президенті Уильям Руто Астана қаласына  келді. 20 мамыр күні мемлекет басшылары екіжақты ынтымақтастықты талқылап, бірқатар құжаттарға қол қояды, деп хабарлайды Orda.kz.       

Әуежайда Уильям Рутону Қазақстан Республикасының сыртқы істер министрі Ермек Көшербаев қарсы алды. Руто әлеуметтік желідегі парақшасында Қазақстанда екі күн болатынын жазды.

«Кения мен Қазақстан он жылдан астам уақыт бойы мақсатты байланыстар мен кездесулер арқылы достық қарым-қатынасты нығайтып келеді. Енді осы жылы қатынастарды жаңа деңгейге көтеретін уақыт жетті. Сауда байланыстарымыз шай, гүл, тыңайтқыштар мен логистика салаларында дамып келеді. Сондай-ақ Найроби мен Астана, сондай-ақ Орталық Азияның басқа елдері арасындағы тікелей қатынастардың артуы да бұл үдеріске оң әсерін тигізуде» деп жазды ол. 

Кения басшысы алдағы уақытта қаржы, ақпараттық-коммуникациялық технологиялар, туризм, энергетика және алмасу бағдарламалары салаларында жаңа мүмкіндіктерді зерттеу арқылы ынтымақтастықты кеңейтуді жоспарлап отырғанын атап өтті.

Бұған дейін Қазақстанның Африка құрлығымен байланыс орнатудағы мақсаттары туралы да айтылған болатын.

Оқи отырыңыз:

• Елімізде жасанды жаңбыр жаудыру қолға алынады
• ДДСҰ Африка елдеріндегі эбола індетін халықаралық маңызы бар төтенше жағдай деп жариялады
• Африкада Эбола вирусы өршіп, 80 адам қаза болды